Қувноқ бўлиб барчага қувноқлик улашиб юр, бунинг эвазига сен билан ҳам қувноқ муносабатда бўладилар.

Тушунмасанг тушунмадим дегин, тушунтирганларида тушунишга ҳаракат қилгин.

* * *

Жониворларга меҳрибон бўлолмаган одам, қандай қилиб одамларга меҳрибон бўлсин!

* * *

Бир жойда кучсиз бўлиб, бошқа жойда кучли бўлишнинг иложи йўқ. Бекорга сандироқлама.

* * *

Бир жойни беҳуда тарк этмоқ бошқа жойга беҳуда ташриф буюрмоқдир.

* * *

Одамлар юмшоқ айтилган гапларга қулоқ соладилар ва амал қиладилар. Қамчи еб ишлашга ўрганган ҳайвоннинг итоаткорлигида хўжайинга нисбатан меҳр бор деб ўйлайсизми?

* * *

Нимагадир боғланиб қолсанг, мустақил бўлолмайсан.

* * *

Шижоат кўрсатиб ишлашдан тортинсанг, ўртамиёна одам бўлиб қоласан.

* * *

У на эр ва на ёр бўла олди.

* * *

Ота-она ҳаётдан кўз юмгач, аввало, уй ҳайвонларига қийин бўлади. 

* * *

Мартабага меҳнатсиз эришиб бўлмайди.

* * *

Тайёрига талашмоқ ҳайвонга хосдир, йўқни бунёд этмоқ инсонга!

* * *

Уруш — ўзаро ҳурмат батамом тугаган жойда бошланади.

* * *

Тан олишни ўрганмагунингча эркак бўлолмайсан.

* * *

Акс таъсирга тайёргарлигинг бўлмаса, таъсир кўрсатиб ўтирма.

* * *

Гап ташиб юрган одам, аввало, ўзини сотиб юрган одамдир.

* * *

Эртага ярим қоғоз буйруқ билан мосуво бўладиган мартабанг, унинг бугун ҳам мавжуд эмаслигидан далолат беради.

* * *

Еган сари очликни, емаган сари тўқлиқни ҳис этдим.

* * *

Бу дунёнинг ишларига ҳеч бўлмаганда қуш парвози баландлигидан қарай олмас экансан, бахтиёр бўлмоқликдан умидингни уз.

* * *

Нарсангнинг қадрини уни йўқотмасдан билолмайсан.

* * *

Болалар машмашасига аралашиб, катта болакай бўлиб қолмагин.

 

Мавлоно МАҲМУД