Айни кунларда Олий Мажлис Қонунчилик палатасида «Ичимлик суви таъминоти ва оқова сув чиқариш тўғрисида»ги қонун лойиҳаси иккинчи ўқишга тайёрланиб, маромига етказилмоқда, дея хабар бермоқда парламент қуйи палатасининг Ахборот хизмати.

Ҳозирги кунда юртимизда аҳолининг 65 фоизи марказлашган ичимлик сув, 17 фоизи оқова сув хизматлари билан таъминланган. 9 минг 408 та сув таъминоти ва 58 та канализация иншооти 72 минг км. ичимлик сув ҳамда 8,6 минг км. оқова сув тармоқлари орқали хизматлар кўрсатилиб келинмокда.
– Мазкур қонун лойиҳаси билан мамлакатимизда ушбу соҳани ривож­лантириш, истеъмолчилар манфаатларини ҳимоя қилиш, амалдаги айрим эскирган меъёрлар ўрнига янги нормалар киритилиб, қонуности ҳужжатларидаги бўшлиқлар тўлдирилмоқда, – дейди Олий Мажлис Қонунчилик палатаси депутати, Ўзбекистон Экологик партияси фракцияси аъзоси Моҳира Ходжаева. – Хусусан, ичимлик сувни биринчи навбатда жисмоний шахслар, озиқ-овқат ҳамда тиббиёт саноатига етказиб беришни таъминлаш, ҳар ойда камида бир маротаба кўрсатилаётган хизматлар миқдорини аниқлаш, ҳисоблагичлар ҳолатини ўрганиш каби меъёрлар ўз аксини топмоқда.
Лойиҳада истеъмолчиларни гуруҳга ажратиш, уларни қувурларга улаш, ичимлик ва оқова сув чиқариш тарифларини ўзгартириш бўйича таклифларни келгусида жамоатчилик муҳокамасидан ўтказиш тартиби белгиланмоқда.
Қайд этиш жоиз, қонун лойиҳасида ичимлик сув ва канализация соҳасига масъул бўлган давлат идораларининг ваколатлари аниқ белгиланмоқда. Хусусан, ҳар ойда камида бир маротаба кўрсатилаётган хизматлар миқдорини аниқлаш ва ҳисоблагичлар ҳолатини ўрганиш, режали тўхталиш ёки тизимдаги узилишларни бартараф этиш давомийлиги 12 соатдан ошган тақдирда аҳолини махсус машиналарда ичимлик сув билан таъминлаш, 1 кун мобайнида тармоқларда бузилишлар, тўхталиш муддатлари ва чекланишлар сабаблари ҳақида истеъмолчиларни хабардор қилиш ҳамда тарифлар ва устама ҳақларининг нархи ўзгариши ҳақида 15 кун олдин истеъмолчиларни хабардор қилиш сув таъминоти ташкилотларининг мажбурияти қилиб белгиланмоқда.