Шу кунларда «Яшил макон» умуммиллий лойиҳаси доирасида «Долзарб 40 кунлик» тадбири давом этяпти. Мазкур лойиҳа доирасида кузги кўчат экиш ишлари суръат билан олиб борилмоқда.

Экилган кўчатларнинг кейинги ҳолати муҳим албатта. Уларни экишда барча зарурий қўрсатмаларга амал қилиниши қилинган меҳнатнинг зое кетмаслигига асос бўлади. Кўчатларни танлаш, бунда нималарга эътибор бериш, тупроқ шароитини яхшилаш ҳамда ниҳолларни турли ҳашарот ва касалликлардан ҳимоя қилиш ҳар биримиздан албатта етарли билим ва маълумотга эга бўлишни тақозо этади. Буни инобатга олган бир гуруҳ мутахассислар аҳолига амалий ёрдам вазифасини ўтайдиган мўъжаз қўлланма тайёрлашди.

Ушбу «Яшил макон» умуммиллий лойиҳаси учун кўчат экиш қўлланмаси» жараёнда юзага келиши мумкин бўлган кўпгина саволларга илмий асосланган жавобларни оммага тушунарли тарзда тақдим этган. Қўлланмада кўчат экиш учун ҳар томонлама муносиб бўлган ер майдонларни танлаш, экишга тайёрлаш, кўчат экишда аҳамият қаратиладиган муҳим жиҳатлар, экиш технологияси кабиларга алоҳида тўхталиб ўтилган. Шунингдек, қадалган кўчатларни тегишли муддатларда озиқлантириб туриш, суғориш, шакл бериш, буташ ва яшартириш борасидаги агротехник кўрсатмалар ҳам кўлланмадан ўрин олган.  Дарахтларни кўчириб ўтқазиш ва экиш муддатлари аниқ жадвалларда кўрсатиб берилган.

Юртимизнинг муайян ҳудудларининг иқлим шароитини инобатга олган ҳолда экиш тавсия этиладиган дарахтлар турлари ажратиб кўрсатилган.

Айниқса, қўлланмадан ўрин олган дарахтларнинг касаллик ва зараркунандаларга қарши кураш тизими ҳар бир фойдаланувчи учун жуда муҳим тавсияларни ўз ичига қамраб олади.

Қўлланма Экология ва атроф-муҳитни муҳофаза қилиш давлат қўмитаси, Ўрмон хўжалиги давлат қўмитаси ҳамда Ўзбекистон Экологик партияси ҳамкорлигида тайёрланган. Уни тайёрлашда лойиҳа раҳбари Н.Обломуродов бошчилигидаги А.Ҳамзаев, М.Холмуродов, Н.Мухсимов, Б.Эшонқулов, Б.Холмурзаева, Ф.Бойжигитов каби муаллифлар жамоаси самарали меҳнат қилишди.

Қўлланма кўчат экиш ва парвариш­лаш ишларида муҳим ва зарурий амалий ёрдам вазифаси ўтайди.