Олий Мажлис Қонунчилик палатасида Ўзбекистон Экологик партияси фракцияси ва қуйи палатанинг Экология ва атроф муҳитни муҳофаза қилиш масалалари қўмитаси томонидан «Aтроф табиий-муҳитни муҳофаза қилиш соҳасида қабул қилинган Ўзбекистон Республикаси қонунларининг мазмун-моҳияти» мавзусида семинар ташкил этилди.

Семинарда Мирзо Улуғбек номидаги Ўзбекистон Миллий университети ўқитувчи ва талабалари ҳамда оммавий ахборот воситалари вакиллари иштирок этишди.

Олий Мажлис Қонунчилик палатаси Спикери ўринбосари, Экология ва атроф муҳитни муҳофаза қилиш масалалари қўмитаси раиси Хайрулло ҒАФФОРОВ сўзга чиқиб, мамлакатимизда атроф-муҳитни муҳофаза қилиш, табиий ресурслардан оқилона фойдаланиш ва уларни асраб-авайлашга давлат сиёсати даражасида эътибор қаратилаётганини таъкидлади.

– Aтроф табиий-муҳитни муҳофаза қилиш соҳасидаги қонунлар аҳолининг ҳаёти ва соғлиғини муҳофаза қилишга, ўсимлик ва ҳайвонот дунёси обектларини муҳофаза қилишга, шунингдек, ваколатли давлат органларининг ушбу йўналишдаги жавобгарлигини оширишга хизмат қилади, – дейди Ўзбекистон Экологик партияси Марказий кенгаши раиси ўринбосари Камол Жуманиёзов. – Бу жараёнга ёшларнинг қизиқиши аввало жамиятимизда жамоатчилик экологик назорати институти шаклланишига хизмат қилади.

Шунингдек, семинарда Олий Мажлис Қонунчилик палатасига қонун ҳужжатларини такомиллаштириш бўйича келиб тушаётган таклифлар орасида ёшлар ҳиссаси катта экани, айниқса, охирги вақтларда ёшларнинг қонун ижодкорлиги жараёнига бефарқ эмаслиги, улар томонидан соҳанинг ҳуқуқий асосларини такомиллаштириш юзасидан йўлланган таклифларга алоҳида эътибор қаратилаётгани айтиб ўтилди.

Тадбир якунида ёшларни қонун ижодкорлиги жараёнида янада фаол қатнашишга тарғиб этилди ҳамда иштирокилар томонилан берилган савол ва таклифларга депутатлар томонидан жавоб қайтарилди.