Андижон шаҳридаги Президент мактаби эко-таълимни замонавий турмуш тарзининг муҳим асоси деб ҳисоблаб, атроф-муҳитни асраш борасида масъулиятли авлодни тарбиялашни мақсад қилган.

Мактаб жамоаси ўқувчилар ҳамда уларнинг ота-оналарида экологик маданият ва табиатга дахлдорлик ҳиссини ошириш, табиий ресурслардан оқилона фойдаланиш кўникма ва малакасини, табиатга зиён етказувчи ҳаракатларга нисбатан муросасиз муносабатни шакллантиришга киришган.

Ўтган ҳафтада Президент мактабида навбатдаги «Eko-fest» тадбири ўтказилди. Унда «Экология ҳар биримиздан бошланади» шиори остида расмлар танлови бўлиб ўтди. Шунингдек, иштирокчилар томонидан чиқиндилардан қайта ишланган буюмлар ва ҳунармандчилик маҳсулотлари, креатив ва замонавий чиқинди қутилари тақдим этилди. Қолаверса, эко нотиқлар ва эко тарғиботчилар танлови ҳамда шоу намойиши ҳам бўлиб ўтди. «Eko-fashion» шоуда ўқувчилар чиқиндилардан яратилган креатив образларда намоён бўлишди.

«Eko-fest» лойиҳаси икки йилдан буён мунтазам ўтказилмоқда. Лойиҳа халқаро экспертларнинг маърузалари, инсоннинг табиатга таъсири тўғрисидаги амалий семинарлар, мустақил тадқиқотлар, маиший ва иссиқхона шароитларида «ақлли суғориш» орқали сувни тежаш бўйича смарт-ечимларни ишлаб чиқиш, қоғоз ва пластикни қайта ишлаш бўйича маҳорат сабоқлари, сув тозалаш объекти, ҳавони мониторинг қилиш станцияси, чиқинди полигонига экскурсиялар ва бошқа тадбирларни ўз ичига олади.

Президент мактаби 2022 йилда «Eco-school Uzbekistan» лойиҳасининг аъзоси сифатида эко-таълимни амалга ошира бошлаган эди. Лойиҳага аъзо бўлиш ўқувчиларнинг барқарор келажакни таъминлаш бўйича фаол экологик позициясини, иқлим ўзгариши муаммоларини ҳал қилишдаги ҳуқуқ ва имкониятларини кенгайтирди. Бундан ташқари, «Яшил мактаб» дастури доирасида эко-фаол ўқувчилардан иборат «Эко-қўмита» ташкил этилди. Бугунги кунда мазкур ўқувчилар барқарор ривожланиш тамойилларини ўрганмоқда, атроф-муҳитни муҳофаза қилиш усуллари билан танишмоқда ва бошқа эко-мактаб ўқувчилари билан бирга экологик ло­йиҳаларда фаол иштирок этмоқда.