Юртимизда Президентимиз томонидан «яшил» энергетикани ривожлантириш, қайта тикланувчи энергия манбаларини кўпайтириш ва атмосферага чиқарилаётган зарарли ташламалар миқдорини камайтириш борасида зарур чора-тадбирлар белгилаб берилган. Уларни амалга ошириш бўйича Энергетика вазирлиги томонидан қандай ишлар амалга оширилмоқда?

Жўрабек МИРЗАМАҲМУДОВ,

энергетика вазири:

– Бугунги кунда мамлакатимизда умумий қуввати 3 030 МВт бўлган 12 та қуёш фотоэлектр станцияси ҳамда 1 652 МВт қувватли 5 та шамол электр станцияси тўлиқ ишга туширилган. Ушбу станциялар йил бошидан буён 9,1 млрд кВт соат электр энергияси ишлаб чиқарди. Натижада 2,7 млрд куб метр табиий газ тежалди ва 4 миллион тонна зарарли чиқиндиларнинг атмосферага чиқиши олди олинди.

Қайта тикланувчи манбалар нафақат табиий газ сарфини камайтиришга, балки мазут ёқилғисини ишлатишга бўлган эҳтиёжни ҳам йўққа чиқармоқда. Масалан, 2023 йилнинг ёзида электр энергияси ишлаб чиқариш учун 124 минг тонна мазут ёқилган бўлса, 2024 йилда бундай эҳтиёж туғилмади, натижада мазут импорти 200 минг тоннага қисқарди.

Айни пайтда иссиқлик электр станцияларида мазутдан фойдаланиш тақиқланган. У фақат табиий газ босими пасайиб кетган ҳолатларда, Вазирлар Маҳкамаси ва Экология вазирлигига ахборот берган ҳолда, захира ёқилғи сифатида ишлатилади.

Йил якунига қадар қуёш электр станциялари қувватини 4 630 МВтга етказиш режалаштирилган. Бу ҳисобдан, қайта тикланувчи энергия манбалари орқали жами 11,5 млрд кВт соат «яшил» энергия ишлаб чиқарилиб, 3 млрд куб метр табиий газ тежалиши ва атмосферага чиқиши мумкин бўлган 5 миллион тонна зарарли модданинг олди олиниши кутилмоқда.