Аҳоли саломатлигини муҳофаза қилиш ва тиббий хизмат сифатини ошириш депутатларнинг доимий назоратида турган масалалардан.

Зеро, инсон қадри улуғланган юртда сифатли тиббиёт ҳар бир фуқаро учун очиқ ва қулай бўлиши шарт. Халқ вакилларининг жойлардаги реал ҳолатни ўрганиши эса мавжуд муаммоларни тизимли ҳал этиш имконини беради.

Халқ депутатлари Зомин туман Кенгаши вакиллари туман тиббиёт бирлашмаси фаолияти билан яқиндан танишдилар. Кенгаш раиси Д.Бегматова ҳамда Ўзбекистон Экологик партиясидан сайланган депутат Ёрбек Сафаров иштирокидаги бу ўрганиш жараёнида асосий эътибор тиббий хизматнинг бугунги ҳолатига қаратилди.

Депутатлар бирлашманинг моддий-техник базаси, шифохонадаги шароитлар, дори-дармон таъминоти ва тиббиёт ходимларининг иш жараёнини кўздан кечирдилар. Ҳар бир бўлимдаги мавжуд имкониятлар таҳлил қилиниб, аниқланган камчиликлар юзасидан мутасаддиларга зарур тавсиялар берилди. Мулоқотлар давомида соҳадаги сифат кўрсаткичларини ошириш бўйича аниқ вазифалар белгилаб олинди.