Эскилар айтганидек, ер бебаҳо хазина. Негаки, далаларда пишиб етилган ҳосил сабаб дастурхонимиз тўкин, ҳаётимиз фаровон. Бугун аҳолининг озиқ-овқат маҳсулотларига бўлган талаби ортиб бормоқда. Биз эса, ўз навбатида, ана шу заминдан унумли, оқилона фойдаланишимиз зарур.

— Вазирлар Маҳкамаси 2005 йил 16 февралда қабул қилган «Ердан фойдаланиш ва уни муҳофаза қилиш устидан давлат назорати тўғрисида»ги ҳужжатда қўмита ҳамда маҳаллий давлат ҳокимияти органлари зиммасига қатор муҳим вазифаларни юклаган, — дейди «Ергеодезкадастр» давлат қўмитаси раисининг биринчи ўринбосари Тўлқин АБДУЛЛАЕВ. — Мазкур ташкилотлар жойларда қонунчиликка амал қилишни, ердан фойдаланиш ва уни муҳофаза этишни доим назорат қилиб боради.

— Мамлакатимизда ҳам ер қонунчилиги талабларини бузиш, афсуски, учраб турибди. Бунга қарши қандай чора кўрилмоқда?

— Қўмита ва унинг қуйи тизимларига назорат қилувчи органлар фаолиятини мувофиқлаштирувчи республика кенгаши қарори билан тасдиқланган текширишлар режа-жадвалига асосан жорий йилнинг ўтган биринчи чорагида 75 та ердан фойдаланувчилар устидан текширув ўтказилди. Текшириш чоғида 73 ҳолатда (жами 97 фоиз) ердан фойдаланувчилар томонидан 3385 гектар майдонда турли кўринишдаги қонун бузилишлари кузатилган. Афсуски, бунга йўл қўйганлар орасида 62 нафар раҳбар ҳам бор. Уларга Ўзбекистон Республикаси «Маъмурий жавобгарлик тўғрисида»ги кодекснинг тегишли моддаларига мувофиқ чоралар кўрилди.

— Илгари туманда биттадан ер назоратчиси ва ер тузувчи штати бўларди. Табиийки, улар ҳар қанча ҳаракат қилмасин, зиммасига юклатилган ишни бажара олмасди. Бунинг ечими топилдими?

— Бу ҳолатга барҳам берилди. Бугун мамлакатимизда 800 та янги ер назоратчиси штати жорий этилди. Улар жойларда ер билан боғлиқ муаммоларни ҳал этади.

— Тоғли ва лалми ҳудудларда жойлашган ер майдонлари ҳам ҳукумат эътиборида. Ўша жойларда қандай янги лойиҳа ва ишларга қўл уриляпти?

— Зомин ва Қоракўл туманларида чорва истеъмол қиладиган ноёб ўсимлик турини сақлаб қолиш мақсадида уруғчиликка катта эътибор берилмоқда. Мазкур минтақада мевали, манзарали дарахтлар, доривор ўсимликларни кўпайтиришга жиддий киришилди. Масалан, Зомин туманидаги «Ҳулкар пистаси» фермер хўжалигининг қияликларда жойлашган 2 гектардан зиёдроқ ерида томчилатиб суғориладиган мевали боғ яратилди.

— Мақсадсиз ва нооқилона фойдаланилаётган ернинг кейинги тақдири қандай бўлади?

— Белгиланган мақсадларда самарасиз ва нооқилона фойдаланиб келинаётган ер майдони амалдаги қонунга кўра, туман ҳокимлиги захира ер фондига қайтариб олинади ва тегишли тартибда бошқа фойдаланувчига берилади. Жорий йилнинг ўтган чораги мобайнида 2261 та ердан фойдаланувчиларга ажратиб берилган 183 672 гектар ер қайтариб олинди.

Улуғбек АКТАМОВ