Эндиликда ўқувчиларнинг мактабда бўлиш вақти FACE ID тизими орқали назорат қилинади. Халқ таълими вазири Шерзод Шерматов Ички ишлар вазирлиги ва халқ таълими вазирлиги ҳамкорлигида ўтказилган Қўшма Ҳайъат мажлисида бу ҳақда айтиб ўтди, дея хабар бермоқда ЎзА.

Мазкур йиғилишнинг бош ғояси айнан умумтаълим мактабларида ҳуқуқбузарликлар ва жиноятлар профилактикасини таъминлаш масаласига қаратилди. Ёшлар ўртасидаги жиноятчиликка қарши курашда ҳамда ҳуқуқбузарликларга нисбатан муросасиз муносабатда бўлиш, жойларда ички ишлар ва халқ таълими бўлимлари ўртасида ўзаро ҳамкорлик ва маълумот алмашинувини мустаҳкамлаш каби масалалар бугунги куннинг энг долзарб вазифаси сифатида белгилангани алоҳида таъкидланди.

Мактабларда давомат тадбирларини ўтказишда сусткашликларга йўл қўйилиши, ўқувчиларни назоратсиз қолдириш ҳамда профилактика инспекторлари ва мактаб раҳбариятининг ўзаро ҳамкорлик олиб бормаганлиги оғир ва ўта оғир турдаги жиноятларга сабаб бўлмоқда. Тошкент, Наманган, Фарғона, Сурхондарё вилоятлари, Қорақалпоғистон Республикасида юз берган ҳолатлар, ўқувчилар томонидан қўл урилган жиноятлар ва унинг оқибатлари муҳокама қилинди. Тошкент шаҳрида мактаб ўқувчилари ўртасида гиёҳванд моддалари ва психотроп воситаларини тарқалиши каби салбий ҳолатларга йўл қўймаслик, алоҳида назорат талаб этилган мактабларга ходимларни бириктириш масаласида зарурий чоралар кўриш бўйича топшириқлар берилди.

Халқ таълими вазири Ш.Шерматов ўқувчиларни назорат қилиш ва ота-оналар билан ўзаро ҳамкорликни янада кучайтириш мақсадида мактабларда Face ID тизимини жорий этиш, таълим сифатини ошириш мақсадида синф хоналарига овозли камералар ўрнатиш ва уларни ички ишлар органлари ҳамда профилактика инспекторлари билан интеграциялашувини таъминлаш йўлга қўйилиши ҳақида айтиб ўтди.