Депутатлар ва масъуллар метро бекатларида йўловчиларга хизмат кўрсатиш жараёнлари, мавжуд инфратузилма ҳолати ҳамда жамоат транспортидан фойдаланиш учун яратилган шароитлар билан танишдилар.

Халқ депутатлари Тошкент шаҳар Кенгашининг Қурилиш, коммунал, сув хўжалиги, экология, саноат ва транспорт масалалари бўйича доимий комиссияси аъзолари томонидан жамоат транспорти фаолияти ҳамда транспорт инфратузилмаси ҳолатини ўрганишга қаратилган сессияолди назорат тадбирлари давом эттирилмоқда.

Навбатдаги ўрганишлар Тошкент шаҳар ҳокимининг транспорт ва йўл инфратузилмаси масалалари бўйича ўринбосари Абдураҳмон Бахтиев иштирокида пойтахт метрополитенининг «Пахтакор» ва «Ойбек» бекатларида олиб борилди.

Депутатлар ва масъуллар метро бекатларида йўловчиларга хизмат кўрсатиш жараёнлари, мавжуд инфратузилма ҳолати ҳамда жамоат транспортидан фойдаланиш учун яратилган шароитлар билан танишдилар.

Ўрганишлар давомида йўловчилар ҳаракатини тартибли ташкил этиш, поездлар қатновининг мунтазамлигини таъминлаш, бекатларда қулайлик ва хавфсизлик талабларига риоя қилиниши масалаларига алоҳида эътибор қаратилди.

Шунингдек, йўловчилар оқимини самарали бошқариш, метрополитен ва бошқа жамоат транспорти турлари ўртасидаги ўзаро боғлиқликни яхшилаш, фуқароларнинг ўз манзилига қулай ва ўз вақтида етиб бориши учун зарур ташкилий чоралар муҳокама қилинди.

Тадбир доирасида «Тошкент метрополитени» АЖ ҳамда Тошкент шаҳар транспорт бош бошқармаси масъуллари билан мавжуд инфратузилмадан оқилона фойдаланиш, транспорт хизматлари сифатини ошириш ва йўловчилар учун янада қулай шароитлар яратиш юзасидан фикр алмашилди.

Мазкур ўрганишлар жамоат транспорти тизимидаги мавжуд ҳолатни таҳлил қилиш, йўловчиларга хизмат кўрсатиш сифатини яхшилашга доир масалаларни аниқлаш ҳамда уларни Кенгаш сессияси муҳокамасига киритишга қаратилган.