Кейинги йилларда юртимизда амалга оширилаётган кенг қамровли ислоҳотлар негизида, аввало, халқимизнинг фаровон турмушини таъминлаш, жаҳон ҳамжамиятида янги Ўзбекистоннинг нуфузини ошириш сингари устувор вазифалар турибди.
 

Давлатимиз раҳбарининг «Янги Ўзбекистон» газетаси бош муҳаррири билан суҳбатида айни шу жиҳатларга ҳам эътибор қаратилиб, охирги беш йилда юртимизда барча соҳаларда қилинган амалий ишлар батафсил баён қилинган.

Чунончи, ўтган даврда ҳудудларимизда амалга оширилаётган «Обод қишлоқ» ва «Обод маҳалла» давлат дастурлари доирасида кенг кўламли ишлар бажарилди. Биргина жорий йилнинг ўзида барча туман ва шаҳарлардаги жами 7 минг 794 қишлоқ ва маҳаллада умумий қиймати 20,8 триллион сўмлик қурилиш, таъмирлаш ва ободонлаштириш ишлари амалга оширилмоқда.
Юртимизда аҳолини ижтимоий қўллаб-қувватлаш тизими йўлга қўйилиб, бу орқали ҳар бир муҳтож инсонга унинг эҳтиёжини ҳисобга олган ҳолда ёрдам кўрсатилмоқда. Эндиликда ижтимоий ҳимоя тизимида сақланиб қолаётган айрим камчилик ва нуқсонлар босқичма-босқич бартараф этилади. Ушбу тизимни такомиллаштириб, яхши натижа берадиган, жамиятдаги барча соғлом кучларни шу мақсад атрофида бирлаштирадиган даражага етказилади. Бундан кўриниб турибдики, муҳтож фуқароларни тўғридан-тўғри, аниқ мақсад билан моддий қўллаб-қувватлашга қаратилган тизимли чора-тадбирларни амалга оширишда асосий эътибор аҳолининг кам таъминланган қатламларига дотация бериш эмас, балки уларга даромад топиш учун зарур шароит ва имкониятлар туғдиришга қаратилмоқда.
Президентимиз кейинги йилларда эришилган ютуқлар ҳақида тўхталар экан, жумладан, прописка, хорижга чиқиш учун «стикер», мажбурий меҳнат, пахта ва ғаллага давлат буюртмасини белгилаш каби эски тартиблардан мутлақо воз кечилганини мисол келтирди. Дарҳақиқат, Тошкентга мамлакатнинг бошқа бир ҳудудидан ишлаш, яшаш учун келганлардан аввало прописка сўраларди. Ҳатто маълум бир муддат ишлаб, прописка сабаб ишдан бўшаб кетганлар ҳам кўп бўлди. Хорижга чиқиб келишда эса «отангга бор, онангга бор» қабилида бюрократик тўсиқлар бўлгани ҳамон ёдимизда.
Пахта йиғим-терими мавсумида ўқувчиларнинг теримга жалб этилиши узоқ йиллар давом этган ёқимсиз амалиёт эди. Бунинг аччиқ оқибатини эса таълим сифатининг пасайишида ва бошқа кўплаб жиҳатларда кўриш мумкин.
Сирасини айтганда, сўнгги йилларда мамлакатимизда давлатимиз раҳбари бошчилигида кенг кўламли ислоҳотлар амалга оширилаётгани, фуқароларимиз онгу шуурида ҳаётдан розиликларини кўраётганимиз бор гап. Албатта, ҳали олдинда қилинадиган ишларимиз кўп. Мақсадимиз жонажон Ватанимиз тараққиётига муносиб ҳисса қўшиш ва бу йўлда бор тажрибамиз ва кучимизни сафарбар этишдир.

Хайрулло ГАППАРОВ,
Олий Мажлис Қонунчилик палатаси Спикери 
ўринбосари, Ўзбекистон Экологик партияси 
фракцияси раҳбари