Маърифатпарвар шоир Аваз Ўтар «Тил воситаи робитаи оламиёндир» дея тил инсон ва оламни боғлаб турувчи восита, кўприк эканини таъкидлаган. Бугун юртимизда ўзбек тилининг давлат тили сифатидаги мақоми тобора юксалаётгани ҳар биримизга фахр-ифтихор бағишлайди.

Мамлакатимизда ўзбек тилини замон талаблари асосида ривожлантириш, унинг давлат тили сифатидаги ўрни ва нуфузини янада мустаҳкамлаш борасида муҳим қадамлар қўйилмоқда. Давлатимиз раҳбарининг 2019 йил 21 октябрь куни «Ўзбек тилининг давлат тили сифатидаги нуфузи ва мавқеини тубдан ошириш чора-тадбирлари тўғрисида»ги Фармони қабул қилинган эди. Унга биноан 21 октябрь санаси юртимизда «Ўзбек тили байрами куни» деб белгиланди.

Тил байрами муносабати билан пойтахтимизнинг Сергели туманидаги 68-умумтаълим мактабида ўтказилган «Қадринг баланд бўлсин, она тилим» номли маърифий тадбир ўқувчи-ёшлар дилида узоқ вақт сақланиб қолса ажаб эмас. Тадбирга ташриф буюрган филология фанлари номзоди, доцент, таниқли нотиқ Раҳимбой Жуманиёзов она тилимизнинг ўрни ва аҳамияти, давлат тилига бўлган ҳурматни баланд тутиш, нотиқлик санъати хусусида қизиқарли ва фойдали маълумотларни ўқувчиларга гапириб берди. Инсон маънавиятида тилнинг аҳамияти, Учинчи Ренессанс пойдевори барпо этилаётган янги Ўзбекистон ёшларининг салоҳияти қандай бўлиши хусусида фикр юритди.

Тадбирда мактаб ўқувчилари Навоий, Бобур, Фурқат, Нодирабегим ва бошқа алломалар ғазалларидан ўқиб, даврага ўзгача файз киритди. Йиғилганлар ўқувчи ёшлар маҳорат билан ижро этган саҳна кўринишлари, куй-қўшиқлардан баҳраманд бўлишди.