Юртимиздаги етакчи матбуот нашрларидан бири сифатида тан олинган «Маърифат» газетаси миллий журналистикамизнинг ўзига хос маҳорат мактаби бўлиши билан бирга, ўқитувчиларнинг яқин ҳамкорига айланган.

Халқ зиёлилари нашри ҳисобланган «Маърифат» мамлакатимиздаги таълим ислоҳотларининг мазмун-моҳияти ва соҳа янгилик­ларини кенг жамоатчиликка етказиш, мавжуд ютуқларни юзага чиқариш, муаммоларни таҳлил қилиб, бартараф этишга ҳисса қўшиб келмоқда. Газетада муаллимлар учун керакли методик қўлланмалар, тавсия, дарс ва тадбир ишланмалари, таълим-тарбияга оид амалий таклифлар, таҳлилий, танқидий ва илмий-оммабоп мақолалар, адабий-бадиий асарлар чоп этилади.

Жорий йилда «Маърифат» газетаси чоп этила бошлаганига 90 йил тўлди. Мазкур сана муносабати билан газета таҳририяти ижодкорлари томонидан «Меҳр ва маҳорат мактаби» китоби ўқувчиларга туҳфа этилди.

– Халқ таълими энг оғир ва муаммолари кўп соҳа, лекин буларнинг барчасини енгиб ўтса бўлади. Биз ҳар доим қўлни-қўлга бериб, халқ таълими билан ҳамкорлик қилишга тайёрмиз, – дейди «Маърифат» – «Учитель Узбекистана» газеталари бош муҳаррири Ҳусан Нишонов. – Биз ушбу китобни нега айнан «Меҳр ва маҳорат мактаби» деб номладик? Чунки бу нашр таҳририятида кўп йиллар катта устозлар, ўз мактабини яратган ижодкорлар меҳнат қилишган.

«Меҳр ва маҳорат мактаби» китоби тўрт бобдан иборат бўлиб, унинг «Маърифат»ли устозлар» деб номланган биринчи бобига «Маърифат»да фаолият юритган бир қатор журналистларнинг хотиралари, тилаклари жамланган. «Халқ зиёлилари газетаси» деб аталган иккинчи боб узоқ йиллардан бери газета билан ҳамкорлик қилиб келаётган таниқли олимлар ва фаол ўқитувчиларга ажратилган. «Ҳаммамиз «Маърифат»данмиз», «Маърифат» маҳорат мактаби» бобларидан эса таҳририятда фаолият юритган таниқли журналистлар ва газета қошида ташкил этилган маҳорат мактаби тингловчиларининг мақолалари ўрин олган.

«Меҳр ва маҳорат мактаби» китоби ҳар бир оила кутубхонасидан жой оладиган фойдали нашр бўлгани, шубҳасиз.

Мансурбек ЖАББОРОВ,

«Оила ва табиат» мухбири