Жисми ва руҳи соғлом бўлган одамгина том маънода ўзини бахтли ҳис эта олади. Негаки, инсон учун энг катта бахт ва бойлик саломатлигидир.

Куни кеча Ўзбекистон бадминтон федерацияси мажмуасида мамлакатимизда фаолият олиб бораётган оммавий ахборот воситалари ходимлари ўртасида «Янги йилга спорт билан!» шиори остида бадминтон мусобақаси ўтказилди. Унда телевидение, радио, газета, ахборот агентликлари, интернет журналистикаси, турли корхона-ташкилотларнинг матбуот хизмати вакиллари омадини синаб кўришди.

Муросасиз беллашувларга туризм ва спорт вазири ҳамда Ўзбекистон журналистлари  ижодий уюшмаси раиси ўртасидаги рамзий ўйин билан старт берилди. – Туризм ва спорт вазирлиги томонидан ташкил этилган мусобақа журналистлар ва соҳада хизмат қилаётган ходимларни соғлом турмуш тарзига жалб этиш, уларни жисмоний фаолликка чақиришга қаратилгани билан аҳамиятли, – дейди Туризм ва спорт вазирлиги бўлим бошлиғи Зарина Абдуллаева. – Журналистлар ўртасидаги бу галги баҳсларнинг олдингилардан фарқли жиҳати, унда иштирокчилар ёш тоифаси бўйича беллашишди. Бу эса мусобақанинг ҳар жиҳатдан адолатли ва холис ўтишини таъминлади.

Қизиқарли ва дўстона ўтган баҳсларда М.Эрматова, Ҳ.Маннапова, С.Ниёзов ва Б.Мақсудов яккалик баҳсларда ғолиб чиққан бўлса, А.Муроджонов, М.Эрматова жуфтлик мусобақаларида бош совринга муносиб деб топилди. Ғолиб ва совриндорлар медаль, диплом ҳамда спорт анжомлари билан тақдирланди.

Мансурбек ЖАББОРОВ, «Оила ва табиат» мухбири