Пойтахтимиздаги Миллий боғда оилавий сайр қилиб юрибмиз. Мени хурсанд қилгани бошқа боғлардан фарқли бу ерни дўкон, пулли аттракционлар билан тўлдириб ташлашмабди.

Тармоқлардаги айрим танқидлардан кейин ҳа, Миллий боғниям ҳар томонига икки йилда қуриб қоладиган арчалар экиб, қуёш қиздириб турадиган бир жойга айлантиришибди-да, деб ўйлагандим, йўқ, келиб айланиш, ўпкани тоза ҳавога тўлдириб кетиш учун яхши жой бўлган.

Умид қиламанки, шаҳардаги экологик муҳитни балансга келтиришда бу каби баҳаво жамоат боғларини қуриш (таъмирлаш) ишлари давом этади.

Булар бугун Миллий боққа бориб кўргандан кейинги ижобий хулосаларим. Энди бир нечта салбий хулосаларимни ҳам айтиб кетсам.

Кайфиятимни туширгани боғдаги таъмир давомида кўп йиллик дарахтларнинг 80-90 фоизига жиддий, қўпол тарзда шикаст етказилибди.

Шу туфайли ҳозир кўплаб чинор, эманлар бутунлай қуриш ҳолатига келиб қолган. Айримлари қурибди ҳам (буни яшириш учун уларга чироқлар осиб чиқишган).

Миллий боққа зудлик билан малакали агрономлар ва дарахт­лар учун агротехник тадбирлар керак. Агар иш озгина кечиктирилса, биз ўнлаб кўп йилик дарахтларни йўқотамиз.

Шунингдек, ҳудуддаги кўл ҳам майдон жиҳатидан анча қисқарибди. Афсуски, бу энди тўғрилаб бўлмайдиган иш.

Такрорлайман, Миллий боғдаги дарахтларга зудлик билан ёрдам зарур. Давлат экология қўмитаси ёки Миллий боғни сақлаб туришга масъул идоралар мурожаатимга эътиборсиз бўлмайди, деб умид қиламан.

Экофаолларни бу масалага бефарқ бўлмасликка чақираман.

Илёс САФАРОВ