Туркманистон пойтахти Ашхобод шаҳрида 17 — 27 сентябрь кунлари Жанг санъати ва ёпиқ иншоотлардаги V Осиё ўйинлари бўлиб ўтди. Эътиборлиси, тўрт йилликнинг ушбу муҳим ўйинлари савиясини ошириш мақсадида бу сафар Океаниядан ҳам бир нечта давлат вакиллари қўшилди. Шу тариқа, жами 62 та давлатдан келган спортчилар ғолиблик учун кураш олиб борди.

Мазкур ўйинларда Ўзбекистондан 189 нафар спортчи иштирок этди. Минтақамиз спортчилари туркман миллий кураши, от спорти, баскетбол 3х3, белбоғли кураш, бильярд, боулинг, шахмат, спортча рақс, футзал, енгил атлетика, теннис, жуи-житцу, кикбокс, кураш, тайбокс, самбо, сузиш, таэквондо, велоспорт, оғир атлетика сингари спортнинг 21 тури бўйича беллашди.

Мусобақа якунига кўра, Ўзбекистон спорт делегацияси 24 олтин, 33 кумуш ва 74 бронза, жами 131 медални қўлга киритган ҳолда, умумжамоа ҳисобида бешинчи ўринни банд этди. Бу энг кўп медаль жамғариш бўйича иккинчи кўрсаткичдир.

Кучли учликни эса мезбон Туркманистон (89 та олтин, 70 та кумуш, 86 та бронза), Хитой (42-32-23) ва Эрон (36-23-59) терма жамоалари эгаллади.