Эй Навоий, қилма Жамшиду Фаридун васфиким,

Шоҳ Ғозийға карам аввалгиларға ўхшамас.

Куни кеча Ёзувчилар уюшмасида буюк мутафаккир бобомиз, ғазал мулкининг султони Алишер Навоий таваллудига бағишлаб ўтказилган тадбир шоир Омон Матжоннинг шу ғазалга боғланган мухаммаси билан бошланди.

Анжуманни бошлаб берган Ўзбекистон халқ шоири Иқбол Мирзо буюк бобомизнинг бу галги таваллуди муносабати билан Ёзувчилар уюшмаси китобхонларга катта туҳфа тайёрлаганини билдирди. «Сўз мулкининг султони Алишер ­Навоийнинг «Хазойин ул-маоний» асари ва унинг рус тилидаги таржима китоби «Сокровищница мыслей» китоби нашрдан чиқарилди. Ушбу китобни жаҳоннинг 14 тилида нашр этиш лойиҳасини амалга оширишга киришилган. Шунингдек, алломанинг ёдини абадийлаштириш ва ижод аҳлининг унга ҳурмати мисолида «Ҳазрат Навоийга эҳтиром» тўплами чоп этилди», деди у ўз сўзида.

Академик Ғафур Ғуломдан тортиб, бугун эндигина шеърият бўстонига кириб келган шоирларнинг ижод намуналаридан тузилган ушбу тўплам шеърлар, достонлар, мухаммаслардан иборат.

— Бу тўплам Навоий даҳосининг кимлигини ўсиб келаётган ёш авлодга англатишда катта манба бўлади, — деди адабиётшунос Сувон Мели. — Чунки унга киритилган шеърлар, достонлар, мухаммаслар Навоийнинг ижод гулшанига йўл очади. Шоирнинг шахсиятини, руҳиятини, фалсафасини тушунишга ёрдам беради. Зораки, бугунги ёшлар шу тўпламдаги ижод намуналарини ўқиб, Навоийнинг ижод гулшанига ташриф буюришса. Бир вақтлар Навоийни рус тилига хато таржима қилишди, барчасига кўз юмганмиз. Энди бундай хатоликларни тузатиш вақти келди.

Анжуманда, шунингдек, халқ шоирлари, навоийшунос олимлар янги нашрлар ҳақидаги ўз мулоҳазалари билан ўртоқлашишди. Мулоҳазаларга ёшларнинг Навоийга бағишловлари якун ясади.

Ўз мухбиримиз