Ҳозир пойтахтимиздан бошқа ҳудудларда даврий матбуот нашрлари сотиладиган киосклар жуда кам учрайди. Қидириб топгунча анча сарсон бўласиз. Айниқса, ўзингизга қадрли бирон газета ё журнални харид қилиш учун баъзан бир тумандан иккинчи туманга боришга тўғри келади. Нега шундай?

— Илгари пойтахтимизнинг марказий кўчаларида газета ва журналлар сотиладиган киосклар бўларди, лекин бугун уларнинг кўпи олиб ташланди, — дейди «Матбуот тарқатувчи» акциядорлик компаниясининг Истиқболли ривожлантириш ва молия бўйича директори Маҳмуд ОРИПОВ. — Бунинг сабаби кейинги пайтларда пойтахтда қурилиш ва ободонлаштириш ишлари олиб борилмоқда. Шу боис Ўзбекистон Республикаси архитектура ва қурилиш давлат қўмитаси кўчалардаги киоскларни олиб ташлаш ҳақида кўрсатма берган. Лекин аҳоли гавжум ҳудудларга янги кўринишдаги киоскларни ўрнатиш бўйича жойлар аниқланиб, қўмитага тақдим этилган. Агар бу масала ижобий ҳал этилса, марказий кўчалардаги аҳоли гавжум бекатларга янги кўринишдаги киосклар, албатта, ўрнатилади.

— Тошкент шаҳрида нечта киоск фаолият олиб боради?

— Бундан ўн йил олдин пойтахтимизда 250 та киоск мавжуд эди. Ҳозир улардан 180 таси қолган. Айримлари терминал ўрнатилмагани учун вақтинча ёпиб қўйилган. Улар терминал билан жиҳозлангач, аҳолига хизмат қилишни давом эттиради.

Шунингдек, янги кўринишдаги киоскаларни ўрнатиш келгуси йилларда босқичма-босқич йўлга қўйилади.

Ғуломжон МИРАҲМЕДОВ,

«Оила даврасида» мухбири