озодликдан маҳрум этилди

Муқаддам судланган тошкентлик О.К. турмуш ўртоғи билан ажрашиб, фарзандини боқувчисиз қолдирган. У оиласини оғир аҳволда ташлаб кетганига қарамай, турли баҳоналар билан алимент тўлашдан бош тортиб келган.

Фуқаролик ишлари бўйича Тошкент шаҳар Мирзо Улуғбек туманлараро судининг 2014 йил март ойидаги ҳал қилув қарорига кўра, О.К. фарзандининг моддий таъминоти учун алимент тўлаб бориши белгиланган эди. Аммо қонуний бурчини бажаришдан очиқчасига бош тортган О.К. 38 ой давомида 8 миллион 240 минг сўм миқдордаги алимент пулини тўламай келган.

Мирзо Улуғбек туманида ўтказилган сайёр суд залида О.К.га алимент қарзини тўлаш таклифи билдирилди. Лекин у пулни тўлаш ва ярашишни истамади. Вояга етмаган фарзандини моддий таъминлашдан бош тортгани учун О.К. Ўзбекистон Республикаси Жиноят кодексининг 122-моддасига мувофиқ бир йил муддатга озодликдан маҳрум этилди.

Пойтахтлик А.А. ҳам вояга етмаган фарзанди таъминоти учун алимент тўлашдан бош тортиб келган. У 2012 йил 1 январдан жорий йилнинг июль ойига қадар бўлган вақт мобайнида 16 миллион 404 минг сўм алиментдан бўлган қарзини тўламаган. А.А. сайёр суд залида мазкур қарзни тўлиқ тўлади.

Бу каби сайёр суд мажлисларини ўтказишдан кўзланган мақсад нафақат айбдорларга жазо тайинлаш, балки содир этилган жиноий қилмишнинг келиб чиқиш сабабларини таҳлил қилиш, фуқаролар ўртасида ҳуқуқий тарғиботни кучайтириш ҳамда жиноят ва ҳуқуқбузарликларнинг олдини олишда давлат ва жамоат ташкилотлари билан кенг жамоатчилик ҳамкорлигини янада мустаҳкамлашдир.

Даврон СУННАТОВ,

ЎзА