Яқин дугонамнинг тўйига таклифнома олдим. У шу қадар чиройли эдики... Нархи ҳам шунга яраша экани аниқ. Ўйлаб қолдим, бир кунга хизмат қилувчи қоҚоз. Фақат бир марта ишлатамиз ва кейин чиқитга айланади. Бунинг учун шунча пул сарфлаш шартмикан? Оддийроқ қоҚозда ортиқча жимжималарсиз ҳам таклифнома чиқарса бўлади-ку!

Тўй эгалари меҳмондўстлигини кўз-кўз қилиш учунми ёки кимўзаргами — дастурхонни бир ҳафтага етадиган егуликлар билан тўлдириб юборишган. Қанча есангиз ҳам тугамайди, гўё қайнар булоқ. Келин-куёв тўйхонага кириб келди. Тўй бошланди. Қўшиқлар, карнай, сурнай. Кечанинг маликаси ва шаҳзодаси бўлмиш келин-куёв ҳамманинг диққат марказида.

Икки гавдали эркак уларнинг столи олдида ҳайкалдай тош қотиб, туриб олган, ҳеч ўрнидан жилмайди. Кейин билсам, келин-куёвга қўриқчи экан. Очиғи, буни эшитиб ҳайрон қолдим. «Келин-куёв учун қўриқчи!? Қизиқ, тўйи куни уларга ким ҳам босқинчилик қиларди? Ўзининг тўйида, яқинлари, дўстлари даврасида қўриқчига қанчалик ҳожат бор? Айтишдики, бу ҳам бекорга эмас, балки суратга туширмаслик учун экан. Тўйда ҳамма эсдалик учун суратга тушиши анъанага айланиб қолган. Тўғри, бу баъзилар учун ёқимсиз ҳол бўлиши мумкин. Лекин бунинг учун қоровул ёллаш эмас, балки тўйхонанинг сураткаши билан «келишиб олиш»нинг ўзи кифоя эмасми?

Ёшларимиз ҳинд кинолари таъсирида катта бўлган. Энди эса уларга тақлид қиляпти. Аммо ёши катталар қаерга қараяпти?

 Киноларда кўриб ёки кимлардандир эшитганман бу ҳолат ҳақида. Бироқ бунга шахсан гувоҳ бўлишим тушимга ҳам кирмаган эди. «Нима экан» дейсизми? Қайнота ва келин рақси! Бу одат бизнинг тўйларимизга ҳам кириб келганини қаранг...

Ёшларнинг бундай ишларига ўрганиб қолгандик. Лекин энди улар сафига катталар ҳам қўшиляпти. Ўзбек қизларига ҳаё, ибо аждодлардан мерос. Ҳеч қачон қайнотанинг кўзига тик қарашмаган. Бироқ ҳозир мана шу кўзларга нима бўлди, бир-бирини қўлтиқлаб рақсга тушса...

Шарқ мамлакатлари ўз анъаналари билан доим Европадан ажралиб турган. Нега энди ўзимизнинг гўзал урф-одатларимизни бошқаларга тарғиб қилиш ўрнига уларнинг одатларини ўзимизда талқин қилишимиз керак?

Озода ВАЛИЕВА