Баъзи юртдошларимиз сувга челаклаб чиқиндини ўйламай-нетмай ағдариб кетишади. Айрим кимсалар назарида сув ахлатларни ёки чиқиндиларни оқизиб кетувчи восита гўё. Мана шундай кимсаларнинг касрига бугун миллионлаб инсонлар оғир экологик фожиаларга рўбара келмоқда, бир қултум тоза сувга зорликда ҳаёт кечирмоқда.

Яқинда Жомбой туманидаги бир пайтлар «Jomboy don mahsulotlari» акциядорлик жамияти тассарруфида бўлган оқова сувни тозалаш иншоотининг ҳозирги ҳолати билан танишдик. Бундан эллик йил аввал барпо этилган бу иншоот ғаллани ювишдан ҳосил бўлган оқова сувни тозалашга мўлжалланган. Замон илгарилаб, турли ишлаб чиқариш объектлари, кўп қаватли бинолар пайдо бўлмоқда. Оқова сувни тозалаш иншоотига ҳозирги пайтда эҳтиёж ошган, албатта. Бу иншоотни яқин йиллар оралиғида қайта тиклаш ёки уни атроф муҳитга зарарли таъсирининг олдини олиш борасида бирор бир амалий иш қилинмагани кўриниб турибди.

Оқова сувни тозалаш иншоотига номаълум манбадан оқиб тушаётган ифлосланган сув тўғридан-тўғри Саричашма, Узуновул қиш­лоқларидан оқиб ўтувчи Оқариқ ариғига қуйилмокда. Оқариқнинг сувларидан эл чорва молларини суғориб, йил бўйи томорқаларида экин етиштиради. Бу сувда балиқ етиштираётган фермер, оилавий тадбиркорлар ҳам бор.

Ифлосланган сув оқибатида айрим касалликлар тарқалмаслигига, чорва ва полиз экинлари орқали инсонлар соғлиғига зарар етмаслигига ҳеч ким кафолат бера олмайди.

Халқаро аҳамиятдаги автомобиль йўли четида, «Jomboy don mahsulotlari» АЖга қарама-қарши томонда жойлашган оқова сув тозалаш иншоотидаги аянчли экологик вазият афсуски бирор бир мутасаддини безовта қилмаяпти. Узоқ йиллардан буён бу жой ўз ҳолига ташлаб қўйилган. Оқова келиб тушадиган катта ҳажмдаги идишларда ҳам ифлос сув сақланади.

Иншоотни қайта тиклаш, қишлоқ ҳўжалик ва аҳоли экинзорларига оқиб  бораётган хатарли ифлосланган сувни тозалашнинг бирор чораси топилмас экан, аҳоли орасида турли эпидемологик касалликларнинг келиб чиқиши турган гап. Ўйлаймизки, мутасадди ташкилотлар бу муаммога вақтида чора кўришади.

Нишон МЕЛИЕВ,

Жомбой тумани