Янги Ўзбекистон тараққиёт стратегияси ҳар бир фуқаронинг ҳуқуқ ва эркинликларини, қонуний манфаатларини энг олий қадрият этиб белгиланган ҳолда «инсон – жамият – давлат» тамойили асосида миллий ривожланишнинг янги босқичини бошлаб беради.

Бугунги кунда инсоният ўз тарихидаги ниҳоят­да мураккаб даврни бошдан кечирмоқда. Мислсиз хавф-хатар ва таҳдидларга дуч келмоқда. Ер юзида коронавирус пандемияси ва унинг оқибатида келиб чиққан глобал иқтисодий инқироз ҳануз давом этмоқда. Янги Ўзбекистон тараққиёт стратегияси шу мақсадда ҳар бир хонадон ва маҳаллада, бутун юртимизда тинчлик ва барқарорликни сақлаш, аҳолининг ҳаёт даражаси ва сифатини ошириш, жаҳон ҳамжамияти билан дўстлик ва ҳамкорликни кенгайтиришга қаратилган янада изчил давлат сиёсатини давом эттиради.

Таъкидлаш керак, Янги Ўзбекистон тараққиёт стратегияси етти йўналишдан иборат бўлиб, унда ижтимоий-иқтисодий ҳаётимизнинг устувор соҳалари қаторида экологик масалаларга ҳам алоҳида эътибор қаратилган.

Мамлакатимизда атроф муҳитни муҳофаза қилиш, табиий ресурслардан оқилона фойдаланиш борасида амалга оширилаётган ишлар ижтимоий-иқтисодий ҳаётимизнинг барқарор ривожланиш кафолати бўлмоқда. Экологик муаммоларнинг инсон хавфсизлигига таъсирини эътиборга олган ҳолда, соҳада туб ислоҳотлар амалга оширилди, соҳани ривожлантиришнинг ташкилий-хуқуқий асослари яратилди.

Хусусан, бу борада 30 га яқин муҳим қонунлар ҳамда 300 га яқин қонуности ҳужжатлари ҳаётга татбиқ этилди. 2030 йилгача бўлган даврда Ўзбекистон Республикасининг Атроф муҳитни муҳофаза қилиш концепцияси, 2019-2030 йиллар даврида Ўзбекистон Республикасининг «яшил» иқтисодиётга ўтиш стратегияси, 2019-2028 йиллар даврида Ўзбекистон Респуб­ликасида биологик хилма-хилликни сақлаш стратегияси каби ўрта ва узоқ муддатга мўлжалланган дастурлар мамлакатнинг барқарор ривожланишини таъминлашда муҳим ҳужжат бўлиб хизмат қилмоқда.

Бугунги кунда мамлакатимиз халқаро ҳамжамиятнинг тенг хуқуқли аъзоси сифатида соҳадаги ўндан ортиқ халқаро ҳужжатларни ратификация қилди. Биргина иқлим ўзгаришлари бўйича Париж келишуви доирасида Президент Шавкат Мирзиёев ташаббуси билан Оролбўйида дунё ҳамжамияти эътирофига сазовор бўлаётган туб ўзгаришлар амалга оширилмоқда.

Давлатимиз раҳбарининг Бирлашган Миллатлар Ташкилоти сессияларида билдирган барча ташаббуслари қаторида, экология соҳасидаги таклифлари ҳам дунё ҳамжамияти томонидан қўллаб-қувватланмоқда. Оролбўйи минтақасида инсон хавфсизлигини таъминлаш бўйича кўп томонлама Траст фондининг таъсис этилиши ҳамда БМТ томонидан Оролбўйи минтақасини экологик инновациялар ва технологиялар ҳудуди, деб эълон қилиш тўғрисидаги махсус резолюциясининг қабул қилиниши том маънода ўзбек дипломатиясининг ютуғи бўлди.

Сўнгги йилларда Орол денгизининг қуриган тубидаги 1,6 млн. гектар майдонда саксовул ва чўлга чидамли бошқа ўсимликларнинг экилиши мамлакатнинг халқаро ҳужжатлар доирасида қабул қилган мажбуриятларнинг амалий натижаси, дейиш мумкин. Тараққиёт стратегиясида ушбу ишларни жадал амалга ошириш назарда тутилгани келгусида Оролбўйида инсон хавфсизлиги учун экологик мақбул ҳудуд барпо этишга замин яратади.

Сир эмас, юртимизда экологик таҳдидларнинг салбий таъсири ортиб бормоқда. Буни яқинда содир бўлган қум бўронлари ҳам яна бир бор тасдиқлади. Шу сабабли давлатимиз раҳбари ташаббуси билан тараққиёт стратегия­си асосида мамлакатни яшил майдонлар билан қоплаш ишларини бугунги 8 фоиздан 30 фоизга чиқариш марралари олдинга қўйилди.

Президентимиз жорий йилнинг 15-16 июль кунлари «Марказий ва Жанубий Осиё: минтақавий боғлиқлик. Таҳдидлар ва имкониятлар» мавзусидаги халқаро конференцияда нутқ сўзлаб, минтақадаги таҳдидлар ва имкониятлар, барқарор ривожланиш бўйича ўнта асосий ташаббусни илгари сурди. Ушбу ташаббуслар ичида экология ва атроф муҳит муҳофазасига, иқлим ўзгаришига мослашиш, минтақада «яшил» иқтисодиётни ривожлантириш, Оролбўйи ҳудудида экологик ҳолатни яхшилаш ҳамда БМТ билан ҳамкорликда ҳудудда озиқ-овқат хавфсизлигини таъминлашга доир масалаларга алоҳида эътибор қаратилди. Тараққиёт стратегиясида мазкур конференцияда қабул қилинган қарор ва ҳужжатларнинг изчил бажарилиши учун халқаро ҳамкорлар билан зарур чора-тадбирларни амалга ошириш назарда тутилган.

Хулоса қилиб айтганда, Янги Ўзбекистоннинг тараққиёт стратегияси мамлакатда экология ва атроф муҳит муҳофазаси соҳасида давлат бошқарувининг ҳуқуқий асосларини демок­ратик қадриятлар асосида ривожлантириш, халқимизнинг қулай атроф муҳит шароитида яшаш ва фаолият олиб бориши каби конституциявий ҳуқуқини таъминлаш учун мустаҳкам асос бўлади.

Ислом ХУШВАҚТОВ,

Олий Мажлис Қонунчилик палатаси

депутати, Ўзбекистон Экологик партияси

фракцияси аъзоси