Мусаффо тонг отиши, заминга илиқ қуёш нурларининг тушиши инсон қалбига гўзаллик, кўтаринки руҳ бағишлайди.

Тонгга ошуфта бўлиб, қалбда яшашга, яхшиликка иштиёқ янада ортади. Кўнглида ҳайрли ишларни бажариб, меҳнат қилиш, ҳалол нон топишни ният қилган ҳар киши эрта тонгдан ўз иш жойига ошиқади.

Аксарият инсонлар эрталабдан яхши кайфиятда ишхонаси томон ошиқади. Қулай ва шинам хоналар, қишда иссиқ, ёзнинг жазирамасида эса муздеккина роҳатижон кондиционерли хоналар қарши олади уларни. Иш вақти ҳам аниқ: 8 ёки 9 да бошланиб, кечки 6 да тугайди...

Аммо шундай инсонлар борки ҳар қандай об-ҳавода ҳам ташқарида меҳнат қилишига тўғри келади. Қишда совуқда, ёзда эса қуёш тиғида туриб, сизу биз қадам босиб ўтаётган йўлу йўлаклар тоза ва ободлиги учун тинмай меҳнат қилади улар.

Тонгда ишга йўл олганда тоза-озода кўчалардан оёқ кийимингизга гард юқтирмай ўтсангиз қандай яхши, шундай эмасми?! Йўлларнинг орасталигини кўриб беихтиёр кўзингиз қувнайди, кайфиятингиз кўтарилади. Бунинг замирида ҳам ана ўша заҳматкаш инсонларнинг саҳармардондан туриб қилган меҳнати ётади.

Улар кимлар?

Ишга кетаётиб йўл четини супураётган аёлларни кўрганмисиз? Кўргансиз, албатта. Ҳа, улар ободонлаштириш хизматининг меҳнатсевар ишчиларидир.

Сизу биз нонуштага ўтирганимизда улар аллақачон ўз иш ўрнини эгаллаб, тозалашни бош­лаб юборган бўлади.

Ўтган-кетганда қўлимиздаги чек қоғози, конфет ўрами, сигарет қолдиғи ва бошқа ташлаб кетган ашёларни ҳам, дарахт барглари, шамолда учиб келган бошқа чиқиндиларни ҳам кўча юзидан олиб, тоза қилиб қўйишади. Писта пўчоғигача супуриб, ернинг юзини очишади.

Тан олайлик, эрта тонгдан супургини иш қуроли қилиб қўлидан қўймайдиган бу ходимларни кўрганда кўплар ўзини тортади, айланиб ўтади. Баъзилар менсимайди. Аслида дунёда улардан-да қалби пок, ишига масъулиятли, гўзал одобли инсонлар бормикан? Улар ҳам сиз ва биз каби инсон, ишчи, оилада ота ёки она. Шундай экан, нега ҳеч бўлмаганда «Ҳорманг опа, чарчаманг» деб ўтишни ўзимизга эп кўрмаймиз?!

Шаҳримиз ҳавосининг тоза, мусаффо бўлиши учун мевалию манзарали дарахт­лар экишда ҳам, гўзал кўриниши учун майсаю гулларни ерга қадашда ҳам, қуриб қолмасин дея уларни парваришлашда ҳам мана шу заҳматкашларнинг машаққатли меҳнати улкан. Келганлар, кўрганлар ҳавас қилсин дея обод манзиллар яратишга интилган ана шундай инсонлар бугун орамизда, ёнгинамизда, бир девор нарида ташқарида ҳамон вазифасини бажармоқда. Улар ҳақиқатдан олқишга лойиқ. Нега олқишламайсиз уларни?

Аслида юрт манзилларининг, кўчаю хиёбонлар, гузарларнинг озодалигига ҳар биримиз масъулмиз. Лекин тозаликка ҳисса қўшиш ўрнига писта чақиб пўчоғини ерга ташлайдиганлар, деразадан қоғоз отадиганлар, сувни ичиб, бўшаган идишини улоқтирадиганлар, камига чиқиндиларни белгиланган жойга олиб боришга эриниб, дарахтлар тагига, зовурларга ташлаб кетадиганлар атрофимизда жуда кўп. Энг ёмони, уларнинг қилаётган ишини кузатиб, дакки бериш, «тўхта, ундай қилма» дейиш ўрнига жимгина кетадиганлар кўплиги.

«Эй одамлар, бир лаҳза тўхтаб, қилаётган ишингизни бир ўйлаб кўринг. Хатоларингизни бир он бўлса-да англанг», дея ҳайқиргинг келади беихтиёр.

«Кўчани тозалаш – ишчиларнинг иши, бу меники эмас. Ойликни олдими, қилсин» дея беписанд бўлманг. Озодалик учун ҳаммамиз масъуллигимизни унутманг!

«Менинг уйимни олдини тозалашмаяпти» деб арз қилаётган ватандошим, «Бизнинг йўлимизни таъмирлашмаяпти» деган маҳалладошим, «Ҳамма жой барг бўлиб кетди, ободонлаштириш қаёққа қараяпти» деган ҳамшаҳарим, бироз тин олинг. Озгина сабр қилинг. Кундан-кун кенгайиб бораётган гўзал шаҳримиз ободлиги йўлида хизмат қилаётган ободонлаштириш ходимлари улгурмай қолишгандир. Уларни бирдан қоралаб, таъна қилманг. Барча юкни, масъулиятни фақат бошқалар гарданига ташлаб, ўзингизни соқит қилманг. Майли ёрдам қилманг, аммо ҳеч бўлмаса атрофни ифлослантирманг, чиқиндилар билан кўчаларни «безаётган»ларга бефарқ бўлманг.

Кўчада кетаётган биродарим. Йўлингизда кўчангизни супураётган, ариқ қазиб дарахтларни суғораётган, тўкилган баргларни тўдалаб машиналарга ортаётган ишчиларни кўрсангиз бирров тўхтаб «Раҳмат!» деб қўйинг. Биргина раҳматингиз уларга тоғдек куч беради.

Шаҳримиз ҳавосини тозалашга хизмат қилаётган, ҳар бир дарахтда, атроф чиройи­га чирой қўшаётган ҳар бир гулда меҳнати бор бу меҳнатсеварлар инсонларнинг. Биз сизлардан миннатдормиз, олдингизда қарздормиз. Қўлларингиз дард кўрмасин...

Амонмурод АМОНОВ,

Навоий шаҳар партия ташкилоти раиси