Мамлакатимизда сўнгги йилларда хотин-қизларнинг ҳуқуқ ва манфаатларини таъминлаш, оила институтини ҳар томонлама мустаҳкамлаш бўйича салмоқли ишлар олиб борилмоқда.

Бу борадаги давлат сиёсатини самарали амалга ошириш мақсадида энг қуйи бўғин – маҳалла ва хонадонгача кириб борадиган вертикал тизим яратилганини алоҳида таъкидлаш лозим.

Оила ва хотин-қизлар билан ишлаш тизимини тубдан ислоҳ қилиш мақсадида 2022 йилнинг март ойида Ўзбекистон Республикаси Президентининг иккита фармони ва битта қарори қабул қилинди. Мазкур ҳужжатлар жамиятда ва оилаларда соғлом, барқарор ижтимоий-маънавий муҳит ҳамда тинчлик, тотувлик ва осойишталикни таъминлашнинг ташкилий-ҳуқуқий механизмларини самарали жорий этишни янги босқичга олиб чиқди. Жумладан, «2022-2026 йилларда хотин-қизларнинг мамлакат иқтисодий, сиёсий ва ижтимоий ҳаётининг барча жабҳаларида фаоллигини ошириш» бўйича Миллий дастур қабул қилинди.

Миллий дастурнинг 85-бандида жамият ривож­ланишининг замонавий хусусиятларини инобатга олиб, Оила кодексини такомиллаштириш бўйича вазифалар назарда тутилган. «Ўзбекистон Респуб­ликасининг Оила кодексига ўзгартириш ва қўшимчалар киритиш тўғрисида»ги қонун лойиҳасини ишлаб чиқишда БМТнинг «Никоҳ тузиш ва тан олиш тўғрисида»ги Гаага Конвенцияси (1978 йил 14 мартда), шунингдек, АҚШ, Хитой, Россия, Япония, Буюк Британия, Германия, Швейцария, Туркия сингари

20 га яқин давлатларининг фуқаролик ва оила қонунчилиги ҳамда ҳуқуқни қўллаш амалиё­тидаги муаммолар, статистик маълумотлар ўрганилди ва таҳлил қилинди.

Ишлаб чиқилган таклифларнинг мазмун-моҳия­ти оилани мустаҳкамлаш, фарзандларнинг ҳуқуқ ва қонуний манфаатларини ҳимоя қилиш, никоҳ тузишга монелик қиладиган ҳолатлар, шу жумладан, ёш шажара бўйича яқин қариндошлар ўртасида никоҳ тузишнинг олдини олишга оид нормаларни киритиш масалаларидан иборат.

Қолаверса, Миллий дастурнинг 89-бандида «Оилаларнинг бахтлилик даражасини аниқлаш орқали улар билан якка тартибда ишлаш, низоли вазиятларни эрта аниқлаш ҳамда якка тартибли ёндашувни тизимли йўлга қўйиш мақсадида халқаро бахтлилик индикаторларини ўрганиш ҳамда оилаларнинг бахтлилик индикаторини ишлаб чиқиш» мақсадида институт томонидан ишчи гуруҳ таркиби шакллантирилди. Бунда халқаро бахтлилик индикаторлари ҳамда Буюк Британия, Франция, Хитой, Бутан Қироллиги, Индонезия, Малайзияда жорий қилинган индекслар таҳлил қилинди. Таҳлил ва ўрганишлар натижасида оилаларнинг бахтлилик индикаторлари аниқланди. Бунда ўзбек миллатининг характери ва турмуш даражасидан келиб чиқиб субъектив ва объектив бахт кўрсаткичлари инобатга олинди.