Ўзбекистон Экологик партияси сайловда иштирок этиш учун талаб этиладиган имзоларни йиғиб бўлди

Ўзбекистон Республикаси Сайлов кодексига асосан сиёсий партия ўзининг сайловда иштирок этишини қўллаб-қувватловчи камида 40 000 сайловчининг имзосини тўплаган тақдирдагина депутатликка номзодлар кўрсатиши мумкинлиги белгиланган. Қонунга муворфиқ имзо варақаларининг белгиланган намунадаги бланкалари сайлов кампанияси бошлангани эълон қилингандан кейин Марказий сайлов комиссияси томонидан сиёсий партияларнинг ваколатли вакилларига тақдим этилган эди.
Ўтган ҳафта сўнгида бошланган сиёсий партияларнинг жорий йил 27 октябрда Ўзбекистон Республикаси Олий Мажлиси Қонунчилик палатаси ва халқ депутатлари маҳаллий Кенгашлари учун бўлиб ўтадиган сайловларда иштирок этиш учун сайловчиларнинг қўллаб-қувватловчи имзоларини йиғиш тадбирлари мана бугун ўз ниҳоясига етди.
Ушбу муҳим жараёнда юртдошларимиз кутилаётган сайловларда иштирок этишини муҳим деб билган сиёсий партияларни қўллаб-қувватлаб имзо қўйдилар. Ушбу имзо тўплаш тадбирлари ҳар галгидан-да қизғин ва ҳамюртларимиз фаоллигида ўтгани аҳолининг сиёсий жараёнларга дахлдорлиги ошаётгани, онгу тафаккури юксалаётганидан дарак беради.
Хусусан, мамлакатимиз экологиясини яхшилаш, атроф-муҳитга зарар етказиши мумкин бўлган турли таҳдидларнинг олдини олиш ва экологик сиёсатни янги босқичга олиб чиқишни бош мақсад қилиб қўйган Ўзбекистон Экологик партиясини ўн минглаб юртдошларимиз фаол қўллаб-қувватлаб, сайловда иштирок этишига ишонч билдирдилар. Партиямизни қўллаб-қувватлаганлар орасида турли ижтимоий қатлам вакиллари, нуронийлар, хотин-қизлар ва ёшлар борлиги, уларнинг Экопартия дастурий мақсадлари билан яхши таниш экани қувонарлидир. Улар партия келгуси сайловларга янги таклиф ва ташаббуслар, ҳаётий мақсадлар билан кириб боришига астойдил ишонишмоқда.

Партия томонидан ташкил этилган имзо йиғиш тадбирлари нафақат юртдошларимизнинг қўллаб-қувватловчи имзоларини йиғиш, шунингдек, партия аъзолари сафига қўшилиш истагида бўлганларни аъзоликка қабул қилиш, партиямизнинг ғоя ва мақсадларини янада кенг ёйиш учун ўзига хос катта имконият бўлди, дейиш мумкин.

Имзо йиғиш пунктларида юртимизнинг турли нуқталарида кузатилаётган экологик муаммолар: атмосфера ҳавосининг ифлосланиши, табиий захираларнинг камайиши ва чўлланишнинг кенгайиши каби муаммоларга қарши курашиш борасида амалга оширилаётган ва олиб борилиши зарур бўлган чора-тадбирлар бўйича очиқ, дўстона руҳда мулоқотлар ўтказилди. Экологик ҳуқуқбузарликларга қарши курашишда жамоатчиликнинг фаол иштироки нақадар муҳим аҳамият касб этиши ҳақида сўз юритилди. Бир қатор юртдошларимиз имзо йиғиш пунктларининг ўзида партия аъзолигига қабул қилиндилар.
– Мен Ўзбекистон Экологик партиясининг бўлажак сайловларда иштирок этишини қўллаб-қувватлаб имзо қўйганимнинг сабаби шуки, партиянинг асосий фаолияти табиатни сақлашга ва инсонларни тоза муҳитда яшашига қаратилганидир, – дейди Тошкент давлат аграр университети талабаси Наврўза Ҳамроева. – Яна бир эътиборли жиҳати шуки, Экологик партия томонидан сайловчиларнинг қўллаб-қувватловчи имзоларини йиғиш жараёнлари одамларга жуда қулай жойларда ташкил этилганидир. Айниқса одамлар гавжум жойларда, аҳоли яшаш жойларида ва ташкилотларга бориб ҳам ташкил этилгани эътиборлидир.
Биласизми, Экологик партиянинг ўз олдига қўйган барча дастурий мақсадлари мамлакатимизнинг ҳар жабҳада ривожланишида, инсонларни қулай атроф-муҳитда яшашга бўлган ҳуқуқларини рўёбга чиқаришда жуда муҳимдир. Жорий йил октябрь ойида бўлиб ўтадиган сайловда ҳам фаол иштирок этиб, ўзим муносиб деб топган номзодларга овоз бермоқчиман.
Ўзбекистон Экологик партияси томонидан жорий йилги сайловда муносиб иштирок этиш учун зарурий барча чора-тадбирлар белгилаб олингани ва халқ ичига кириб бориб уларнинг ишончини қозониш асносида 638 мингдан зиёд аъзоларни ўз сафида бирлаштиргани боис белгиланган миқдордаги имзоларни тўплаш муаммо бўлмади. Бу жараёнда жойлардаги БПТ раислари, партия фаоллари, депутатлар, партиянинг “Аёллар қаноти”, “Ёшлар қаноти” фаол иштирок этишди.
Бугунги глобал экологик вазият, мавжуд экологик муаммолар жамоатчиликдан бу борада янада ҳамжиҳатликда ҳаракат қилишни тақозо этаётган айни паллада буни теран англаган ҳолда юртдошларимизнинг фаоллиги ортиб бораётгани, шахсий дахлдорлик ҳисси билан экологик сиёсатни янги босқичга олиб чиқиш мақсадларига бефарқ эмаслиги қувонарлидир. Ўйлаймизки, юртдошларимиз, мамлакатимизда яшил иқтисодиётни ривожлантириш, қулай атроф-муҳит шароитини яратиш, келажак авлод учун табиий захираларни асраш, биологик хилма-хилликнинг камайишининг олдини олишга эришиш учун кутилаётган сайловнинг кейинги босқичларида ҳам Ўзбекистон Экологик партиясини мана шундай фаоллик билан қўллаб-қувватлашади.

Камолиддин РЎЗИМАТОВ,
ЎЭП МК Матбуот ва ахборот хизмати бош мутахассиси