Эндиликда сув хўжалиги соҳасидаги ҳуқуқ­бузарликлар бўйича далилий видеоматериал тақдим этган фуқаролар рағбатлантирилмоқда.

Ҳукумат қарори (352-сон, 07.06.2025 й.) билан сув хўжалиги соҳасидаги ҳуқуқбузарликларни фуқаролар томонидан аниқлаш ва хабар бериш тизимини жорий этувчи муҳим ҳуқуқий ҳужжат – «Жисмоний шахслар томонидан қайд этилган сув хўжалиги соҳасидаги ҳуқуқбузарликлар тўғрисидаги фотосуратлар ва (ёки) видеоёзувларни қабул қилиш, кўриб чиқиш ҳамда уларни тақдим этган шахсларни рағбатлантириш тартиби ҳақида»ги низом тасдиқланди.

Янги тартибга кўра, «тарвуз муздек бўлсин, газонлар тўйиб сув ичсин» деб, сувдан фойдаланиш тартиби бузилаётган ҳолатлар кузатилса, уларни видеoгa олиб, 48 соат ичида «v-nadzor.gov.uz» веб-сайти орқали Сув хўжалиги вазирлиги ҳузуридаги инспекцияга юбориш мумкин. Юборилган фото ва видеоматериаллар қонун бузилиш ҳолатларини аниқлашда асос сифатида кўриб чиқилади.

Материалларда қуйидагилар акс эттирилиши талаб этилади:

– ҳуқуқбузарлик ҳолати;

 – агар мавжуд бўлса, ҳуқуқбузар шахс тўғрисидаги маълумотлар;

– воқеа содир этилган манзил, сана ва вақти;

– видеоматериаллар узоғи билан 120 сониядан ошмаслиги шарт.

Юборилган материаллар 10 кун муддатда Инспекциянинг масъул ходимлари томонидан кўриб чиқилади. Агар ҳуқуқбузарлик биринчи марта қайд этилган бўлса, ҳуқуқбузарга сувдан фойдаланиш тартибини бузмаслик бўйича расмий тавсиялар юборилади.

Бироқ, шу каби ҳолат 1 йил ичида такроран содир этилса, Маъмурий жавобгарлик тўғрисидаги кодекснинг тегишли моддаларига мувофиқ жарима қўлланилади. Ҳуқуқбузарликни фош этган шахс жарима ундирилган тақдирда рағбатлантирилади. Яъни, ҳуқуқбузардан ундирилган жариманинг 25 фоизи миқдоридаги пул мукофоти мазкур маълумотни тақдим этган шахсга 15 кун ичида тўлаб берилади.

Бу ташаббус сув ресурсларидан оқилона фойдаланиш, қонун бузилишларига қарши жамоатчилик назоратини кучайтириш ва фуқаролар фаоллигини оширишга қаратилган.