Зарур масаллиқлар: 300 грамм мол гўштидан қийма, 3 дона пиёз, 200 грамм думба ёғ, зираворлар ҳамда туз. Хамирига: 100 грамм маргарин, бир чойқошиқ ўсимлик ёғи.

Тайёрланиши: пиёз майда тўғралиб, қийма билан аралаштирилади. Сўнгра туз ва зираворлар солиб, одатий сомса масаллиғи тайёрланади ва музлатгичга ярим соатга қўйилади.

Хамирини тайёрлаш учун идишга ун солиб, хона ҳароратида эриган маргарин солинади ва уқаланади. Сўнг олдиндан тайёрланган тузли сув қуйилади. Ўртача қаттиқликда хамир қорилади ва 40 дақиқага музлатгичга қўйилади. Сомса қирсиллаб, қат-қат чиқиши учун хамир ёйилиб ўртасига маргарин ва ўсимлик ёғи сурилиб, рулетга ўхшатиб ўралади ва яна 20 дақиқа музлатгичга қўйилади. Тайёр «рулет» кесилиб ёйиб чиқилади ва қийма солинади. Қийманинг энг устига бодом катталигидаги думба биттадан териб чиқилади ва тугилади. Сомса усти ялтираб чиқиши учун тухум сариғи суртилади ва устига седана сепилади. Сўнг тухум оқига бир чимдим туз сепиб, сомсанинг орқасига сурилади ва олдиндан қизиб турган бўш қозонга бир текисда ёпилади. Барчаси ёпилгач, газ баландлатилади. 20 дақиқадан сўнг ўрта оловга пасайтирилади. Сомсалар қирқ дақиқада тайёр бўлади.

Бу кўп қаватли уйда яшовчилар учун жуда қулай усул. Чунки сомсанинг таъми худди тандир сомсани эслатади.