— Яқинда маҳалла вакиллари коммунал тўловларни ўз вақтида тўлашни сўраб, хонадонма-хонадон кириб чиқишди. Бу фуқаролар йиғинининг ваколатига кирадими? 

Эшитишимча, бунинг учун маҳаллага пул ҳам берилар экан. Бу маблағ нималарга сарфланади?

Беҳрўз ШОРАҲИМОВ,

Шайхонтоҳур тумани

— Ҳа, бу маҳалланинг ваколатига киради. «Фуқароларнинг ўзини ўзи бошқариш органлари тўғрисида»ги қонуннинг 13-моддасига кўра, фуқаролар йиғини кенгаши фуқаролар томонидан коммунал хизматлар ҳақини тўлиқ ва ўз вақтида, ҳисоб-китобини банклар орқали амалга оширган ҳолда тўлашларини коммунал хизмат кўрсатиш ташкилотлари билан биргаликда уюштиради ва назорат қилади.

Аҳоли коммунал хизматлар ҳақини тўлиқ тўлашини таъминлагани учун фуқароларнинг ўзини ўзи бошқариш органига маблағлар ўтказилади.  Фуқаролар йиғини кенгаши эса бу маблағни белгиланган тартибда кам таъминланган оилаларга коммунал хизматлар ҳақини тўлашда ёрдам бериш, фуқаролар йиғинлари органлари ходимларини рағбатлантириш,   ободонлаштириш ва кўкаламзорлаштириш ишларини ўтказишга ишлатади.

Саволга Тошкент шаҳар Шайхонтоҳур тумани 2-давлат нотариал идораси нотариуси

Камола ЖЎРАБОЕВА

жавоб берди.