Тобора рақамлашиб бораётган бугунги дунёда электрон ресурслардан оқилона фойдаланиш кўникмасини ёшларда тўғри шакллантириш кун тартибидаги асосий масала бўлиб қолмоқда.

Ижтимоий тармоқларда кунига 6 соат ёки ундан кўп вақт ўтказадиган ўспиринлар ва ёшларда хавотирлик симптомлари 2 бараварга, суицидал фикрлар пайдо бўлиш хавфи эса кунига 1 соатдан кам фойдаланадиганларга нисбатан 3 бараварга юқори. Бу ҳақда UTHealth Houston тадқиқотчилари томонидан ўтказилган янги изланишда маълум қилинди.

Pediatrics Open Science журналида нашр этилган ушбу тадқиқотга Техас университети Соғлиқни сақлаш илмий маркази профессори Жефф Темпл бош­чилик қилган.

Профессор Темплнинг таъкидлашича, ёшлар ижтимоий тармоқларда бош­қаларнинг фақат мукаммал ва бахтли лаҳзаларини кўриб, ўзларини улар билан солиштиради. Бундан ташқари, экран қаршисида кўп вақт ўтказиш реал ҳаётдаги ижтимоий мулоқот ва руҳий хотиржамлик берадиган машғулотлардан узоқлашишга олиб келади.

Тармоқларда 6 соатдан ортиқ вақт сарфлаш қизлар орасида ўғил болаларга нисбатан кўпроқ кузатилган. Шунингдек, хавотирлик ва депрессия симптомларининг ижтимоий тармоқлар билан боғлиқлиги қизларда янада ёрқинроқ намоён бўлган.

Тадқиқот 2018 йилдан 2025 йилгача бўлган даврда 1 066 нафар ёшларнинг йиллик сўровномалари асосида олиб борилди. Иштирокчиларнинг 17 фоизидан ортиғи кунига 6 соатдан кўп вақтини ижтимоий тармоқларга сарфлашини билдирган.

Мутахассисларнинг таъкидлашича, ушбу илмий далиллар ёшларнинг смартфон ва ижтимоий тармоқлардан фойдаланиш вақтини чеклаш ҳамда рақамли муҳитнинг руҳий саломатликка салбий таъсирини камайтириш бўйича амалий чоралар кўриш зарурлигини кўрсатади.