Деҳқон ва сабзавоткорларнинг декабрь ойида ҳам иши кўп бўлади. Аввало, ҳосилдан бўшаган майдонларни келаси йил экини учун тайёрлаш талаб этилади. Шунингдек, ушбу ойда эртаги сабзавотлардан — карам, сабзи, кўкатлар ва эртаги картошка экиш учун режаланган майдонларда жўяклар тортиб, тайёрлаб қуйиш керак.

Негаки, эрта баҳорда, айниқса, ўтлоқ ерларда ернинг етилиши қийинроқ кечиб, экиш муддати кечикиб кетиши мумкин.

Ер чопилиб, юмшатилмаган бўлса ҳам уни келгуси мавсумга тайёрлаш керак бўлади. Бунинг учун ажратилган ер турли ўсимлик қолдиқларидан тозаланади, нотекис жойлари текисланади, гектарига 20-25 тонна ҳисобида гўнг солинади. Кейин унинг режаланган қисмларига совуққа чидамли сабзавотлардан сабзи, пиёз, ош лавлаги, кашнич, петрушка ҳамда салат каби ўсимликлар тўқсонбости қилиб экилади. Бундай усулда экилган ўсимлик уруғлари эрта баҳорда жуда тез униб чиқади ва ривожланади. Уруғ экилган жой устини чириган гўнг, ёғоч қириндиси (мулчалаш) ёки плёнка билан ёпиш яхши самара беради. Бундай усулда сабзи, пиёз, ош лавлаги ҳамда кўкатлар уруғи жуда тез ривожланиб, эрта баҳорда экилганига қараганда 28-40 кун олдин етилади ва 15-20 фоизга кўпроқ ҳосил тўплайди.

Юртимизнинг марказий ҳудудларида тўқсонбости усулида экиш тадбири ноябрь ойининг иккинчи ўн кунлигидан декабрь ойи биринчи ўн кунлиги охирига қадар, жанубий вилоятларда 20 декабрга қадар экиш тавсия этилади. Тўқсонбости экиш муддатида уруғларни помидор, бодринг, карам, картошка ҳамда полиз экинларидан бўшаган майдонларга экиш улардан мўл ҳосил етиштириш имконини беради. Бунда сабзининг — «Шантане», «Нантская», «Зийнатли»; пиёзнинг — «Испанский-313», «Истиқбол», «Зафар»; ош лавлагининг — «Бордо 237», «Бикорес»; укропнинг — «Узбекский-243», «Орзу»; петрушканинг — «Сахарная» ва «Нилуфар» каби совуққа чидамли навларини экиш тавсия этилади. Экиш чоғида эса суғориш эгатларини ҳам олиш мақсадга мувофиқ.

Оқбош карамдан эртаги ва мўл ҳосил олиш учун жанубий вилоятларда (Сурхондарё, Қашқадарё) карам кўчатларини декабрь ойининг учинчи ўн кунлигида плёнка остига экиш тавсия этилади. Шунда апрель ойида ҳосил олиш мумкин бўлади.

Иссиқхоналарда

Ушбу ойда иссиқхоналарда қуйидаги чора-тадбирлар амалга оширилади:

— бодринг экилган иссиқхоналарда ўсимликни (жумладан, микроунсурлар билан ҳам) озиқлантириш, суғориш, шакл бериш, касаллик ҳамда зараркунандалар билан зарарланишининг олдини олиш тадбирлари амалга оширилади. Шунингдек, бодрингнинг пастки сарғайган барглари ва «мўйлов»лари олиб ташланади ва ип ёрдамида юқорига тортиб боғлаб қўйилади;

— помидорларнинг эса қишки мавсумда иссиқхонада мева тугишини тезлаштириш учун «ТУ», «Томатон» ва «Полистимулин« препаратлари билан ишлов берилади. Ўсимлик жуда ўсиб кетмаслиги учун 2-3 марта тортиб тушириб турилади. Бунда биринчи тушириш декабрь, иккинчи тушириш февраль ойида амалга оширилади. Шунингдек, касаллик ва зараркунандалардан асраш тадбирлари ҳам қўлланилади.

Мирғани МИРЗИЁДОВ,

Ўзбекистон сабзавот, полиз экинлари ва картошкачилик илмий тадқиқот институти  катта илмий ходими