саломатликка ҳам зарар

Бугун уйларга пластик деразаларни ўрнатиш жуда оммалашган. Тўғри-да, унча-мунчага чиримайди, тоб ташламайди, ёрилмайди, иссиқ, совуқ, шовқин, чанг ўтказмайди. Бир қарашда қаммаси зўрдек. Аммо бундай қулайликнинг ноқулайлиги қам бор — улар «терлайди». Хўш, пластик дераза ойналари нега ичкаридан «терлайди» ва буни қандай тўғрилаш мумкин?

— «Терлаган» ойналар бу ҳали асосий муаммо эмас, — дейди қурувчи-муҳандис Умржан ВАЛИБАЕВ. — Бундай жойда намликнинг йиғилиб қолиши натижасида маълум вақтдан сўнг саломатлик учун зарарли замбуруғлар ва моғорлар пайдо бўлади. Бу шунингдек, таъмирланган деворларга ҳам зарар етказади. Баъзан икки қаватли шишанинг ички қисми эмас, балки ўртаси «терлайди». Бу ойналар ўртасидаги герметикликда нуқсон бор, дегани.

Агар шиша мунтазам «терласа», бу бир камерали шишалар сабаблидир. Бундай ойналар иссиқликни кўнгилдагидек тутиб туролмайди. Хуллас, арзонроққа тушади, кейин дераза табақаси ҳам оғирлашиб кетмайди, деб бир камералисини ўрнатиш тўғрисидаги қарор кўпинча ўзини оқламайди.

Ичкаридан «терлаши» сабаблари

Сабаблари кўп. Хусусан, қуйидагилар бўлиши мумкин:

 уй ичида намликнинг ошиб кетиши (масалан, овқат пиширганда, чайилган кирлар қуритилганда ва ҳоказо)дан;

 ичкарида иситиш батареясининг илиқ ва ташқари қаттиқ совуқ бўлиши ва пластик деразаларнинг етарлича исимаганидан;

 батареялар қайноқ бўлган тақдирда ҳам ойналар «терлайди», дераза олди тахтаси (подоконник)ни текшириб кўриш керак. У ҳаддан зиёд олдинга туртиб чиққан бўлса ҳам дераза томонга иссиқлик узатилишида тўсиқ пайдо бўлади.

 шамоллатиш тизимидаги муаммолар сабабли. Уларга гард ўтириб ёки бошқа сабаблар билан бекилиб қолиб, нам ҳаво ташқарига чиқиб кетолмайди;

 пластик дераза ромларини ўрнатишда герметик кўпик етарли миқдорда киритилмаган бўлса ҳам шундай бўлади;

 агар зич ёпилмайдиган қилиб (нотўғри, қийшиқ) ўрнатилган бўлса ҳам деразалар «терлайди».

Бартараф этиш йўллари

Пластик дераза шишаси буғланмаслиги учун бир қатор профилактика ишларини амалга ошириш мумкин. Ойна олди тахтасидан гул экилган тувакларни олиб қўйинг. Уй ичини доим шамоллатиб туриш керак.

Борди-ю, пластик дераза ўрнатмоқчи бўлсангиз, унинг барча техник қонун-қоидаларга риоя қилиб жойлаштирилишини назорат қилинг. Иложи борича икки камерали (уч қават шишали) дераза ойнаси ўрнатган маъқул. Камерадаги ҳавоси сўриб олиниб, вакуум ҳосил қилингани ундан ҳам яхши. Пластик ром четларининг сифатли беркитилиши (цемент, алебастр ва шпатлёвка ёрдамида) кераклигини унутманг.

Пластик дераза шишасидаги конденсатни йўқотиш учун қуйидагиларни бажариш талаб этилади:

 агар ташқаридаги ҳаво бунга имкон берса, дераза (дарча)ни ҳамиша «шамоллатиш режими»да қолдирган маъқул;

 ошхонадаги шамоллатиш туйнуги ва мўриси соз ишлашини таъминланг. Шамоллатиш туйнугининг ишлашини текшириш қийин эмас. Одатда, унга юпқа қоғоз қўйилса, ёпишиб қолади. Агар тушиб кетса, туйнук йўлини тозалаш талаб этилади.

Тоштемир ҚОРАБОЕВ

тайёрлади.