1. Уйни кондиционер ёрдамида иситишдан олдин унинг имкониятлари ёзилган қўлланма билан синчиклаб танишиб чиқиш лозим. Агар имкониятлари бунга йўл берса, ундан бемалол фойдаланиш мумкин.

2. Айрим кондиционерлар иситиш учун мўлжалланмаган, улар фақат совитади ёки иситиш имкониятлари чекланган бўлади. Лекин электр иситгичларга қараганда, энергияни анча кам сарфлайди, уй ичини тез ва сифатли иситади.

3. Кондиционер иссиқликни уй ичининг бурчак-бурчакларигача ҳайдаб беради. Масалан, кондиционер 1000 Ватт электр энергияси ҳисобига 3600 Ватт энергия берадиган иссиқликни ҳосил қилиши мумкин.

4. «Ёз-қиш» тизимидаги кондиционерларнинг аксариятини «Иситиш режими»да ишлатса бўлади. Аммо уларнинг имкониятлари даражасига эътибор қаратишни ҳам унутмаслик керак.

5. Айрим кондиционерларнинг қўлланмасида ҳаво ҳарорати -5 даражадан паст бўлмаса, иситиш учун ишлатиш мумкинлиги келтирилган.

6. Баъзи инвенторли кондиционерларни ҳаво ҳарорати -15 даража бўлса ҳам «Иситиш режими»га қўйса бўлади. Лекин бундан паст ҳароратда уни ишлатмаган маъқул.

7. Ҳозирги замонавий кондиционерлар икки: ташқи ва ички блокдан иборат. Ҳаво ҳарорати жуда паст бўлса, ташқи блок ва дренаж қувурлари муз билан қопланади. Натижада вентилятор ишдан чиқиб, ичкарига иссиқлик бериш кескин пасайиб кетади.

8. Совуқ ҳавода хладагент моддаси қуюқлашиб кетиши натижасида компрессор бузилиши мумкин. Кондиционер ёрдамида узоқ вақт уй ичини иситиш ундаги деталларнинг тез ейилиб-эскириши ва ишдан чиқишига олиб келади.

Тоштемир ҚОРАБОЕВ

тайёрлади.