Ғаллаорол туманида мева-сабзавот етиштиришга ихтисослашган 300 га яқин фермер хўжалиги фаолият кўрсатиб, кўплаб қишлоқ хўжалик маҳсулотлари экспортга чиқарилди.

Жумладан, Ғаллаорол туманидаги «Baxmal export» масъулияти чекланган жамияти ўтган йили Россия, Хитой ва Бирлашган Араб Амирликларига 14 турдаги 2 минг тоннадан зиёд қишлоқ хўжалик маҳсулотлари экспорт қилди. Жорий йилда Ҳиндистон ва Вьетнам тадбиркорлари билан ҳам шартномалар тузиб, экспорт географиясини янада кенгайтирди.

Корхона ўтган йили ёз-куз мавсумида помидор, қалампир, узум, олхўри, ўрик, мош, нўхат, ловия, картошка, қизил лавлаги, кўкат, гулкарам ва қовоқ экспорт қилган эди. Қиш мавсумида хорижга кўпроқ дуккакли маҳсулотлар, данакли ва қуруқ мевалар чиқарилмоқда. Олинаётган даромад ҳам шунга яраша.

Корхонага ўтган йили 1 миллиард 200 миллион сўмлик имтиёзли кредит ҳисобидан хориждан мева қуритадиган, дуккакли маҳсулотларни тозалаб, саралайдиган замонавий технологик ускуналар келтириб ўрнатилди. 3 сотих майдонда лимон етиштириш учун иссиқхона барпо этилди.

— 728 гектар ерда узум, мева-сабзавот, картошка ва бошқа қишлоқ хўжалик маҳсулотларини экспортбоп қилиб етиштириш устида иш олиб борилмоқда, — дейди корхона раҳбари Анвар САФАРОВ. — Жорий йилда мева шарбати ишлаб чиқарувчи ва қадоқловчи технологияларни ишга тушириш режалаштирилган. Бу яна 20 иш ўрни яратиш имконини беради. Бунинг учун корхонанинг моддий-техник имкониятлари етарли.

Тошқул БЕКНАЗАРОВ,

ЎзА