— Уй шароитида товуқ боқиш мутлақо қийинмас, — дейди пайариқлик Зулайхо ая ТОЛЛИБОЕВА. — Озгина эътибор ва иштиёқ билан парваришласангиз, товуқдан ярим йилда тухум ва гўшт олаверасиз.

Бу парранда парваришга унча муҳтож эмас. Рўзғорга тузуккина даромад келтиради. 15 йил бўлди, уйда товуқ боқаётганимизга. Ҳозир ҳовлида 70 товуғимиз бор. Ана шу сонни ўзгартирмай, бир хилда ушлаб туришга ҳаракат қиламан, нега деганда, катагимиз имконияти шунга яраша. Бўлмасам, товуқларга катакда жой торлик қилади. Рўзғордан ортган тухумни, парҳез гўштни сотамиз, гўнгини томорқага чиқарамиз. Яна йилига 3-4 та товуғимиз курк бўлади. Мен ҳар бирига 15 тадан тухум бостираман, бундан оширмайман. Лекин 20 тадан бостирса ҳам бўлади. Шундай қилинса, 4 та товуқдан 60 та соғлом жўжа олиш мумкин. 5-6 ой ичида улар ҳам каттариб, тухум бера бошлайди. Товуқнинг икки кунда битта тухум қиладигани яхши. Агар ҳар куни тухум қўйса, тез кучсизланиб, касалланади ва бошқа паррандаларга ҳам юқтиради.

Кўпчилик мендан товуқ боқиш учун жўжаларни қандай танлайсиз, деб сўрайди. Бу жуда осон, қутисига қарайман, тинмай биғир-биғир қилаётганларини ажратиб оламан, бўлди. Касаллари секин, имиллаб ҳаракат қилади.

Қишин-ёзин катак тагини қуруқлаб, тозалаб туриш керак. Емини сотиб оламиз, бироқ бу тезда ўзини қоплайди. Умуман, товуқ нима берсангиз, ейди. Дон-сувини узмай, вақтида сувини алмаштириб туриш керак бўлади. Ана шунда рўзғор обод бўлади, чўнтакка эса даромад киради.