Ўзбекистон Ёзувчилар уюшмаси тавсияси билан «Сени яхши кўрамиз, Ўзбекистон!» номли китоб дунё юзини кўрди. Ёзувчилар уюшмасида ушбу китобнинг тақдимоти ўтказилди.

«Академнашр»  нашриётида чоп этилган мазкур тўплам «Осмоним тинч, парвозга шайман», «Ватан ичра мўъжаз ватан»,  «Қуёшли юрт одамлари», «Юрган дарё» деб аталган тўрт бўлимдан иборат бўлиб, ундан Зулфия номидаги давлат мукофоти совриндорлари, уюшманинг «Биринчи китобим» лойиҳасида китоблари чоп этилган ёш ижодкорлар ҳамда «Ёшлик» клуби аъзоларининг мустақиллик, ватан туйғуси, фахр-ифтихор ва юртга муҳаббатга йўғрилган энг сара мақолалари жой олган.

Ўзбекистон халқ ёзувчиси Муҳаммад Али, халқ шоири Иқбол Мирзо, таниқли танқидчи Сувон Мели ва бошқа ижодкорлар ушбу тўплам юртимиздаги амалга оширилган бунёдкорлик ишлари, юртимиз бошидан ўтган оғир кунлар, халқимизнинг асрлар давомидаги барча миллат вакилларига ўрнак бўла оладиган фазилатлари, бугунги осойишта, тинч ва фаровон кунларимизнинг қадр-қиммати ҳақидаги қарашларини ифода этиш билан бирга, эртанги ўзбек публицистикасининг ривожи йўлида белини маҳкам боғлаган, навқирон бир авлод етишиб келаётгани қувонарли ҳодиса эканини таъкидлади. Ёш ижодкорлар томонидан тўпламдаги ҳар бир мақола муаллифининг иқтидори қирралари ҳақида қизғин, ижобий, танқидий ва таҳлилий фикрлар билдирилди.

Тўпламнинг сўзбошисида айтиб ўтилгани каби юртимизнинг турли гўшаларида тинч, осойишта тупроғимизнинг қадрини баланд тутиб яшаб келаётган соддадил, беғубор, танти одамлар, замон қаҳрамонларию фидойи инсонларнинг ютуқлари, халқимизнинг ўзига хос урф-одатлари, даҳолар пойи муборак этган муқаддас қадамжолари, гўзал табиати, мусаффо осмонини куйлаш ижод аҳлига чексиз ҳузур бахш этади.