Ҳар бир оила билан мулоқот ташкил қилиш орқали фуқароларнинг тадбиркорлик билан шуғулланиши учун қулай имкониятлар яратиш бугунги куннинг долзарб мавзуларидан бирига айланган. Ана шу жараёндан Ўзбекистон Республикаси Ташқи иқтисодий фаолият Миллий банки ҳам четда эмас.

Мазкур банк мутахассислари хонадонма-хонадон юриб, даромадини ошириш учун аҳолини тадбиркорликка жалб этмоқда, уларнинг талаби ва шарт-шароитларидан келиб чиқиб кредитлар ажратмоқда.

— Миллий банкнинг ҳудудлардаги 93 та филиалига қарийб 1 миллион хонадон бириктирилган, — дейди Ташқи иқтисодий фаолият Миллий банки аппарати бошлиғи Баҳром ЮСУПОВ матбуот анжуманида. — Банкимиз ходимлари томонидан тадбиркорлик фаолиятини амалга ошириш истагини билдирган фуқароларга йигирма тўртдан зиёд йўналишда намунавий лойиҳалар таклиф этилмоқда. Шунингдек, кредит ҳужжатларини тайёрлашда ва қисқа муддатларда кредит беришда амалий ёрдам бермоқда.

Матбуот анжуманида банкдан 150, 300 миллион сўмгача кредит олишга муваффақ бўлган кўплаб тадбиркорлар кредит олиш масаласининг жуда тез ва ҳеч бир тўсиқларсиз 3-4 кун ичида ҳал бўлганини таъкидлашди.

Нурбек ҒАФФОРОВ