Ўтган йили Қашқадарё вилоятида паррандачилик соҳасида 160 дан ортиқ истиқболли лойиҳа ҳаётга татбиқ этилди. Тухум ва товуқ гўшти етиштиришга ихтисослашган янги тадбиркорлик субъектларида маҳсулдорликнинг янада ошиши натижасида ички истеъмолдан ортган маҳсулотни экспорт қилиш имконияти яратилмоқда.

2016 йилда ташқи бозорга қарийб 200 минг АҚШ доллари миқдоридаги тухум экспорт қилинди. Биргина январь ойининг ўзидаёқ қиймати 438 минг долларлик маҳсулот экспортга чиқарилган.

— Энди маҳсулотимизни экспортга йўналтириш имкониятига эгамиз, — дейди Яккабоғ туманидаги «Кумуш куз файзи» масъулияти чекланган жамияти раҳбари Мақсуд Камолов. — Ўтган йили афғонистонлик ҳамкорларимизга 60 минг долларликдан зиёд тухум етказиб бердик. Ушбу ҳамкорлигимиз жорий йилда ҳам давом этади.

Шаҳрисабз туманидаги «Эко парранда» масъулияти чекланган жамияти фабрикасида боқилаётган Хай-лайн зотли товуқлар касалликка чидамли ва маҳсулдор ҳисобланади.

— Фабрикамизда товуқларни озиқлантиришдан тортиб тухумларни йиғиб олишгача барчаси автоматлаштирилган, — дейди корхона раҳбари Муҳиддин Умидов. — Кунига ўртача 10 минг дона тухум олинади. Тез орада қиймати 1 миллион доллардан ортиқ қўшимча лойиҳани амалга ошириш бўйича ишларни якунлаймиз. Натижада фабрикамизда боқиладиган товуқлар сони 120 минг бошга ортади, 30 янги иш ўрни яратилади.

Нурилло НАСРИЕВ,

ЎзА мухбири