Хомток — токни парвариш қилиш усулларидан бири ҳисобланиб, кузги ва баҳорги ток кесишнинг давомидир. Xомток қилинган ток ҳаво ва қуёш нуридан тўлақонлироқ баҳраманд бўлади, касалликка камроқ чалинади, ҳосили мўл бўлади.

Ток, асосан, икки марта хомток қилинади. Биринчи хомток ток шўра чиқариб, ҳосилли ва ҳосилсиз новдалар фарқлана бошлагандан гуллагунга қадар (шўра хомток), иккинчиси, ток гуллаб, ғўралар мошдек катталикка эга бўлганда (ғўра хомток) қилинади.

Шўра хомтокда кундадан ўсиб чиққан бақувват новдалардан 3-4 таси қолдирилиб, қолганлари кесиб ташланади. Бу усул билан «қариган» шохларни ёшартириш ҳам мумкин. Энди гулга кираётган ҳосилли новдаларнинг учини чилпиш ҳосилни ва унинг сифатини оширади. Негаки, новдалар ўсишдан вақтинча тўхтаб, озиқ моддалар шўра ва гуллар ривожланишига сарфланади.

Ғўра хомтокда биринчи хомтокдан қолган ҳосилсиз, ортиқча, зич ва ноўрин ўсган ва шу йилги новда қўлтиғидан ўсиб чиққан бачкилари олиб ташланади. Хомтокни ўтказиш ток нави, агротехника тадбирлари, об-ҳаво ва ер шароитига ҳам боғлиқ.

Кучли ўсувчи ток навлари хомток қилинганда ортиқча новдалар олиниб, сийраклаштирилади.

Ток ўртача ўсиб, ҳосили яхши бўлса, новдалари тараб, боғлаб қўйилади.

Суст ўсган токнинг барг ва новдалари оз бўлиб, уларни ортиқча сийраклатиш ҳосилнинг офтобдан зарарланишига олиб келиши мумкин.

Хомтокда баргларни кўп ва пала-партиш юлиб ташлаш ярамайди. Хомтокдан кейин қолдирилган новдалар тезда симбағазларга боғланади. Акс ҳолда, улар салгина шамолда синиб кетиши мумкин.

 Манба: mehnat.uz