Тошкент шаҳрида тадбиркорлик фаолиятини лицензиялашда интерактив хизматларни кўрсатувчи ва рухсат берувчи жараёнлар автоматлаштирилган «Лицензия» ахборот тизимлари комплекси (АТК) йўлга қўйилди. Мазкур тизим 2017 — 2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясида белгиланган вазифалар асосида ишлаб чиқилган.

Лойиҳа доирасида Электрон лицензиялаш портали яратилган бўлиб, у интернетдаги https://license.gov.uz манзилида ишга туширилган. Ҳозирда мазкур портал орқали 40 та фаолият тури бўйича лицензия ва рухсатнома олиш учун электрон шаклда ариза топшириш, уни кўриб чиқиш ҳолатларини кузатиб бориш, лицензиялаш ва рухсатнома бериш механизмини автоматлаштирилган ҳолда амалга ошириш мумкин.

«Лицензия» АТКга бугунги кунда 46 та давлат органи ва уларнинг таркибий ташкилотлари ҳамда барча маҳаллий давлат ҳокимияти органи уланган. Шу пайтгача ушбу ахборот тизими комплекси орқали 600 дан ортиқ ариза қайта ишланган, 41 мингдан зиёд лицензия ва рухсатнома реестри киритилди.

Жорий йилда «Лицензия» АТК рухсатнома берувчи барча давлат идораларида босқичма-босқич татбиқ этилади. Натижада 2018 йил 1 январдан эътиборан рухсатномалар бериш жараёни автоматлаштирилиб, лицензия олиш учун рухсат берувчи ҳужжатлар тўлиқ электрон тизимга ўтказилади.

— Мазкур тизимни тадбиркорлик субъектини давлат рўйхатидан ўтказувчи ва унга яна бир қатор хизматларни кўрсатувчи «Ягона дарча»нинг электрон кўриниши деса бўлади, — дейди «Электрон ҳукумат» тизимини ривожлантириш маркази директори ­Шерзод ҲАБИБУЛЛАЕВ. — Бунда фуқаро ўзига маъқул тадбиркорлик фаолиятига лицензия ёки рухсатнома олиш учун барчасини интернет орқали битиради. Ушбу комплекс фуқарони турли бюрократик тўсиқлардан халос этади, идора ва ташкилотлардан бирор маълумотнома ёки бошқа ҳужжат олиш зарурати туғилганда юзага келадиган ортиқча оворагарчилик, югур-югурга чек қўйиб, вақтини тежайди. Энг муҳими, бу коррупциянинг олдини олишда энг самарали воситадир.

Шаҳобиддин РАСУЛОВ,

«Оила даврасида» мухбири