Кўклам келиши билан дала-даштларда деҳқонларнинг юмуши ортади. Баъзи зироатчилар эрта ҳосил олиш мақсадида иссиқхона ташкил этиб, турли кўчатлар ўтқазади. Бунинг машаққати ҳам, роҳати ҳам ўзгача.

— Саккиз йилдан бери иссиқхонада кўчат етиштириб, даромад оляпмиз, — дейди янгийўллик Зиёда МАҲАМАДАЛИЕВА. — Қайнонам билганларини эринмай менга ўргатди. Оиламизда бир одат бор: ҳали қиш совуғи кетиб улгурмасидан ерни экишга тайёрлаймиз, керакли озуқасини берамиз.

Икки сотихли томорқамизда иссиқхона ташкил қилиб, помидор, бодринг, булғор қалампири, гармдори, райҳон кўчатларини парваришлаб, бозорга олиб чиқамиз. Кўчат парваришлашда вақтида сувини, ўғитини бериш, зараркунандалардан асраш, ҳатто, қуёш нурининг қанчалик тушишига ҳам эътибор берамиз. Кўчатлар март ойи бошида экилади ва тўртқулоқ бўлганидан сўнг бошқа кенгроқ жойга ўтқазилади. Бу даврда уларнинг илдизи бақувватлашиб, ўзини яхши тутиб олган бўлади.

 Ерга уруғ қадашдан олдин унинг навига алоҳида эътибор қаратиш лозим. Масалан, помидорнинг — «Султон», «Ўзбекистон», «Юсуповский» навлари; бодрингнинг — «Орзу»; райҳоннинг — «Ошрайҳон», «Ҳожирайҳон», «Садарайҳон» навлари  бизнинг иқлим шароитга мос. Улардан юртимизнинг исталган ҳудудида ҳосил олиш мумкин. Фақат вақтида ишлов, сув ва озуқасини бериш талаб этилади.

Очиғи, кўчат етиштириш ҳосил олишдан машаққатлироқ. Чунки соғлом, касалланмаган кўчатлар яхши ўсади ва ҳосил беради. Бунда иссиқхонадаги ҳарорат ҳам жуда муҳим. Ҳароратни мўътадил сақлаш ишни енгиллаштиради ва парваришда муаммо  бўлмайди.

Помидор, бодринг, булғор қалампири кўчатлари нозик бўлади, касалликка тез чалинади. Шунинг учун ҳафтасига бир маротаба зараркунандалардан ҳимоялаш мақсадида «гуми» дориси сепилади. Миқдор: 10 литр сувга 1 ошқошиқ «гуми». Ҳосил бўлган аралашма кўчат илдизидан то баргига қадар сепилади. Таъсири жуда тез сезилиб, кўчат баргининг ранги тиниқлашади.

Айни апрель ойида эса бундай кўчатларга талаб ошади. Чунки уруғини экишдан кўра, кўчати ўтқазилса, 20-25 кун илгари ҳосил олиш мумкин ва бу давр анча узаяди. Бунинг ҳисобига эса ҳосилдорлик ошади.

Райҳон апрелнинг бошида, помидор, бодринг, аччиқ гармдори, булғор қалампири эса об-ҳавога қараб, 10 апрелдан бозорга олиб чиқилади.

Ана шу ишимиз кетидан тузуккина даромад ҳам оляпмиз. Масалан, ўтган йили кўчатлардан ўртача 6-7 миллион сўм даромад қилдик. Бўш қолган ерга кўкатлар экиб, ундан ҳам 2-3 миллион сўм атрофида фойда олдик. Бу йилги ҳосилдан иссиқхонамизни кенгайтириб, замонавий иситиш ускуналари ўрнатиш ниятидамиз.

Дилфуза ТИЛЛАЕВА

ёзиб олди.