Ҳукуматимизнинг 2014 йил 11 июлдаги қарорига кўра, «Ўзбекистонда аҳолининг молиявий саводхонлигини ошириш» лойиҳасини амалга оширишга киришилган. Лойиҳа доирасида қатор вазирлик ва қўмиталар, нодавлат ташкилотларида махсус тайёргарликдан ўтган тренерлар иштирокида турли тадбирлар ўтказилмоқда.

— Оммавий ахборот воситалари билан ҳамкорлик қилмай туриб, аҳолининг молиявий саводхонлигини, чора-тадбирлар самарадорлигини ошириш мушкул, — дейди Марказий банк раиси ўринбосари Шерзод ХОЖИЗОДАЕВ. — Чунки ижтимоий мавзуни ёритишга ихтисослашган журналистнинг сўзи, аҳолининг молиявий саводхонлигини оширишга қаратилган бўлиши керак. Мамлакатимизда иқтисод мавзусида қалам тебратаётган журналистлар жуда кам. Бу иқтисодий мавзу ва у тор доирадаги одамларгагина керак, деган бир ёқлама қараш ҳосиласидир эҳтимол. Иқтисодий жараёнларни ёритиш журналистдан муайян даражада билим ва тайёргарликни талаб этади. Семинар давомида монетар сиёсат, банк қонунчилиги, банк маҳсулотлари ва тўлов тизимларининг ривожланиш истиқболлари каби муҳим йўналишлар бўйича тайёрланган тақдимотлар, ўзаро суҳбат тарзида ўтган машғулотларда журналистлар кўпгина янгиликлардан хабардор этилди.

— Банкда ишловчи ходим кредит олишда алоҳида имтиёзга эгами?

— Ҳеч қандай алоҳида имтиёзга эга эмас.

— Хорижга бораётган фуқаро ёнида қанча маблағ олиб кетиши мумкин?

— Беш минг АҚШ доллари олиб кетмоқчи бўлса, Марказий банкнинг рухсати керак бўлади. Аҳоли эътироз ва таклифларини инобатга олиб, бу миқдорни келажакда 10 000 долларга етказмоқчимиз.

— Айрим пенсионерлар пенсиясини пластик картада олмоқчи бўлиб юрган экан. Умуман, пенсияни нақд пулда эмас, аксинча, пластик картада олиш мумкинми?

— Агар пенсионер шуни хоҳласа, у ҳолда унга нафақа пули пластик картага тушириб берилади.

— Қай ҳолатда кредит имтиёз асосида берилади?

— Агар тадбиркор грек ёнғоғи ёки лимон кўчати етиштириш ниятида бўлса, унга 5 йил муддатга, 3 йиллик имтиёзли давр билан етарли миқдорда кредит берилади.

Улуғбек ЖУМАЕВ,

«Оила даврасида» мухбири