Чилонзор тумани ҳудудида муқаддам судланган, 1991 йилда туғилган ­Рината Мусаева ўзининг етти, беш ва уч ёшли қизларини уйда қаровсиз, ҳаво ҳарорати юқори даражада иссиқ бўлишига қарамай, хонадон ойналари ва эшигини ёпиқ ҳолатда қолдириб, эшикни қулфлаб, ўз ишлари билан кўчага чиқиб кетган. Оқибатда унинг 3 ва 5 ёшли фарзандлари вафот этган. Мазкур ҳолат юзасидан Чилонзор тумани ИИБ ҳузуридаги тергов бўлими томонидан жиноят иши қўзғатилиб, тергов ҳаракатлари давом эттирилмоқда.

Тошкент шаҳар ички ишлар бош бошқармаси томонидан пойтахт ҳудудида жиноятчиликнинг олдини олиш ва профилактика куни муносабати билан амалга оширилаётган ишларга бағишланган навбатдаги брифингда айтилишича, жорий йилнинг 6 июлидан 13 июлигача пойтахтимизда 18 жиноят қайд этилган ва «изи йўқолмасдан» фош қилинган. Ҳафта давомида қидирувда бўлган 33 жиноятчи қўлга олинган. Тезкор-қидирув тадбирлари натижасида бедарак йўқолган 14 шахс аниқланиб, яшаш манзилига қайтарилган, дейилади ЎзА хабарида.