Тадбиркорларнинг хабари бор: илгари хусусийлаштирилган қурилиши тугалланмаган объектлар ва фойдаланилмаётган ишлаб чиқариш майдонларини хўжалик фаолиятига тезкорлик билан жалб этиш механизми жорий этилди. Бу жараён Президентимизнинг 2017 йил 23 февралдаги «Тадбиркорларнинг ишлаб чиқариш майдонларидан фойдаланишларини янада рағбатлантириш чора-тадбирлари тўғрисида»ги қарори асосида амалга оширилмоқда.

Таъкидлаш керакки, мазкур қарор билан Қорақалпоғистон Республикаси, вилоятлар ва Тошкент шаҳрида намунавий таркибда қурилиши тугалланмаган объектлар ва фойдаланилмаётган ишлаб чиқариш майдонларини хатловдан ўтказиш ҳамда аниқлаш бўйича Идоралараро комиссиялар тузилди. Ўзбекистон Республикаси Хусусийлаштирилган корхоналарга кўмаклашиш ва рақобатни ривожлантириш давлат қўмитасининг ҳудудий органи эса мазкур комиссиянинг ишчи органи этиб белгиланди.

Бундан буён идоралараро комиссия инвестиция лойиҳаси амалга оширилмагани тўғрисида хулоса чиқарса, кейинги ойдан бошлаб юридик шахслар — қурилиши тугалланмаган объектлар ва фойдаланилмаётган ишлаб чиқариш майдонларининг соддалаштирилган солиққа тортиш тартибини қўллаётган мулкдорлар умумбелгиланган тартибдаги солиқ ҳамда бошқа мажбурий тўловларни тўлашга ўтади.

Шунингдек, юридик ва жисмоний шахслар — мулкдорлар ўзларига тегишли илгари хусусийлаштирилган қурилиши тугалланмаган объект ва фойдаланилмаётган ишлаб чиқариш майдони негизида инвестиция лойиҳасини амалга оширмаган ҳолларда, уларга нисбатан мулк ва ер солиғи навбатдаги ҳисобот йилидан бошлаб икки карра миқдорда оширилади ва ҳар бир кейинги ҳисобот йилида икки карра миқдорда, аммо олти каррадан кўп бўлмаган ошириб борилувчи коэффициент қўлланилади.

Ўз навбатида, тижорат банклари қарорда белгиланган вазифаларни ижро этиш доирасида қурилиши тугалланмаган объектлар ва фойдаланилмаётган ишлаб чиқариш майдонлари негизида инвестиция лойиҳаларини амалга ошираётган юридик ва жисмоний шахсларга, ижарачиларга имтиёзли кредитлар тақдим этади. Кредитлар 12 ойлик имтиёзли давр билан 5 йил муддатга ва Ўзбекистон Республикаси Марказий банкининг қайта молиялаштириш ставкасидан ошмайдиган ставкада берилади. Қарор ижроси юзасидан Тошкент шаҳар Мирзо Улуғбек туманида идоралараро комиссия қурилиши тугалланмаган 26 та объект, бўш турган ёки тўлиқ қувватда фаолият кўрсатмаётган 56 та корхонани аниқлади. Фаолиятини чуқур таҳлил қилиб, бўш турган ишлаб чиқариш майдонларининг ҳолатини ўрганиб чиқди.

Шу тариқа, бино-иншоотлар негизида ишлаб чиқариш ва хизмат кўрсатиш лойиҳаларини ишга тушириш, янги иш ўринларини ташкил этиш бўйича бино-иншоот эгалари ва уларга хизмат кўрсатувчи тижорат банклари билан биргаликда тармоқ жадваллари ва инвестицион паспортларини шакллантириш ишларини олиб бормоқда. Ўрганиш натижалари бўйича мулк эгалари иштирокида бўш турган ишлаб чиқариш майдонларидан самарали фойдаланиш, улар негизида янги тадбиркорлик лойиҳаларини амалга ошириш юзасидан чора-тадбирлар асосида тизимли ишлар амалга оширилмоқда.

Миршоҳид СУЛАЙМОНОВ,

Мирзо Улуғбек туман 

давлат солиқ инспекцияси

бошлиғи ўринбосари