миллиардлаб сўмни айлантира олади

Бекободга борганимда табиатан жуда серҳаракат таниш тадбиркорни учратиб қолдим. Бир қучоқ ҳужжат кўтариб олган.

«Шу десангиз, макарон цехи очмоқчимиз. Солижон ўғлим билан бизнес-режа туздик. Банкдан кредит олиб, иш бошламоқчимиз», — деди у.

Бекободлик Маҳмуд Маманов тадбиркорликка бел боғлаган инсонлардан. Ҳозиргача қандолатчилик ҳамда нон маҳсулотлари ишлаб чиқаришни йўлга қўйди. Мана, бугун фаолиятини янада кенгайтирмоқчи. Ундан ишини нимадан бошлаганини сўрадим.

— Бошида нон ва нон маҳсулотлари  ишлаб чиқарадиган кичик корхона очдик, — дейди Маҳмуд Маманов. — Аҳолини беш турдаги нон маҳсулотлари билан таъминлашни йўлга қўйдик. 2016 йил қандолатчилик цехини ишга туширдик. Салкам 150 миллион сўмлик бу лойиҳа натижасида беш киши доимий иш жойига эга бўлди. Бу фаолиятдан тушган даромадга эса оққанд ишлаб чиқариш цехини ишга туширдик ва яна икки киши доимий иш ўрнига эга бўлди.

Кузатишларга қараганда, аксарият кишилар тадбиркорлик фаолиятини бошлашга иккиланаркан. Нима ҳам дердик, кўз қўрқоқ, камига инсон омили... Лекин тадбиркор суҳбатдошимиз эса бу борада бошқачароқ фикрда.

— Бор гап, таваккал қилиш ва маблағ киритишга кўпчилик чўчийди. Аслида тадбиркорликдан, таваккал қилишдан қўрқмаслик керак. «Чумчуқдан қўрққан тариқ экмайди», деб бежиз айтишмаган. Жой, ­хом­-ашё, ишчи кучига керагича маблағ киритилса ва барча иш тўғри режалаштирилса, иш юришиб кетади. Даромад ҳам яхши бўлади.

Суҳбатдошимиздан қандолатчилик цехидан йилига қанча фойда олиши ҳақида сўрадик.

— Ҳозирда керакли маҳсулоту ишчиларнинг ойлик маоши, коммунал тўловлар ва бошқа харажатлардан ташқари, биргина қандолатчилик цехидан йилига 12 миллион соф фойда оляпмиз. Шунингдек, ойига 15 тонна оққанд ишлаб чиқаряпмиз. Бу ҳар ой 2 миллион сўм чўнтакда дегани. Нон ва нон маҳсулотларидан йилига 5 миллион наф келяпти. Агар умумий ҳисобда айтсам, йилига 3 миллиард сўмлик товар айланишини йўлга қўя олганмиз.

Албатта, бу тадбиркор учун улкан натижа. Аммо масаланинг бошқа томони ҳам бор: ишлаб чиқарилган маҳсулотларга қилинган сарф-харажатлар ўзини оқлаши ҳам керак.

— Бунда муҳими — сифатли хомашё, техника ва ишчи кучи. Масалан, оққанд ишлаб чиқаришда асосий хомашё — шакар. Бир килограмм оққанд тайёрлаш учун бир килограмм шакар керак. 4600 сўмдан олиб келинган шакар, оққанд ҳолатида 5800 сўмдан буюртмачиларга етказилмоқда. Бир ойда 15 тонна маҳсулот чиқарилса, даромадни чамалаб кўриш мумкин, албатта.

 Тадбиркорлик билан кўпчилик моддий фаровонликка эришмоқда, ортганини эса бозорларга олиб чиқади. Маҳмуд акадан тадбиркорликдан нималарга эришганини сўрадик.

— Олинган даромаддан фаолиятимизни янада кенгайтирганимизни юқорида айтиб ўтдим. Корхонамиз учун юк машинаси олдик. Бугунга қадар тўртта машина ҳамда компьютерлар сотиб олганмиз. Рўзғоримиз бут, дастурхонимиз тўкин, ҳамма нарсамиз етарли.

Тадбиркор келгусида нон маҳсулотлари учун савдо дўконлари очмоқчи. Оққанд ишлаб чиқаришни ҳам кенгайтириш нияти бор. Айтишича, келаси йили макарон цехини ишга тушираркан. Агар шу режаси амалга ошса, яна тўққизта янги иш ўрни яратилади.

Ноилахон АҲАДОВА

ёзиб олди.