Юртимиз аҳолисининг озиқ-овқат маҳсулотларига эҳтиёжи йилдан йилга ортмоқда. Бу эса ушбу маҳсулотларни доимий назорат этиб бораётган ташкилотлар зиммасига каттагина масъулият юклайди.

— Агентлигимиз озиқ-овқат маҳсулотлари устидан икки турдаги назоратни амалга оширади, — дейди «Ўзстандарт» агентлиги бош директори ўринбосари Жамшид МИРСАИДОВ. — Булар давлат назорати ҳамда сертификатлаштирилган озиқ-овқат маҳсулотлари устидан инспекция назоратидир. Маҳсулотлар стандартларнинг мажбурий талабларига риоя қилиниши устидан давлат назоратини бажариш учун агентлик таркибида 14 та ҳудудий стандартлаштириш ва метрология бошқармалари фаолият юритмоқда.

— Агар маҳсулотга нотўғри сертификат берилса, бунга йўл қўйган мансабдор шахсга нисбатан қандай чора кўрилади?

— Бундай вақтда мансабдор шахс маъмурий жавобгарликка тортилиб, энг кам ойлик иш ҳақининг 30 фоизи миқдорида жарима тўлайди.

— Давлат назорати текширувларида 340 турдаги озиқ-овқат маҳсулотининг сифати ва хавфсизлиги синовдан ўтказилиб, 80 турдаги маҳсулот меъёрий ҳужжатлар талабига номувофиқ, деб топилганини эшитдик. Бундай маҳсулотлар сирасига қайсилар киради?

— Асосан, ароқ, вино, колбаса, нон ва нон маҳсулотлари. Негаки, мазкур маҳсулотларнинг тайёрланишида бирор бир камчиликка йўл қўйилса, бу истеъмолчи учун хавфли бўлади.

— Пойтахтда тайёрланаётган «буханка» нон билан вилоятда тайёрлангани ўртасида фарқ бор. Ноннинг вазни, таъми, кўриниши турлича. Аслида мамлакат бўйича фақат битта стандарт жорий этилган эмасми?

— Тўғри, аслида бир маҳсулот учун ҳамма ҳудудда ҳам ягона стандарт ўрнатилган. Айрим жойларда сифатсиз нон тайёрланишига метрологик жараён, яъни ўлчов воситаларининг яхши текширилмагани сабаб бўлиши мумкин. Ўша ҳудудда тайёрланаётган ноннинг сифатига эътироз бўлса, бемалол (0371) 150-23-00 рақамли ишонч телефонига хабар бериш мумкин. «Ўзстандарт» кўпроқ маҳсулот сифати ва хавфсизлигини текширади.

— Колбаса маҳсулоти учун ҳалол стандарт қачон жорий этилади?

— Мазкур стандартни шу йилнинг учинчи чорагида жорий этиш кўзда тутилган. Бу ҳақдаги маълумот, албатта, ёрлиққа ёзиб қўйилади. Маҳсулотни имкон қадар савдо дўконларидан харид қилиш лозим. Ана шунда ҳеч қандай эътирозга ўрин қолмайди.

— Мувофиқлик сертификати қанча муддатда берилади?

— Агар тадбиркор ўзи ишлаб чиқарган маҳсулотини сотмоқчи бўлса, мувофиқлик сертификати 3 йилга расмий берилади. Фақат бир йилда инспекцион текширув ўтказилади. Агар маҳсулот четдан келтирилган бўлса, у ҳолда мувофиқлик сертификати яроқлилик муддатига қараб берилади.

«Оила даврасида» мухбири

Улуғбек ЖУМАЕВ

ёзиб олди.