Андижонда пилла етиштириш, пилла ва ипак толасини қайта ишлашга ихтисослашган «Andijon silk» корхонасини барпо этиш лойиҳаси ҳамда хорижий технология асосида яратилган янги тут нави тақдимоти бўлиб ўтди.

Корхона таcарруфида тут плантациялари, шунингдек, замонавий ва илғор хорижий технологиялар асосида махсус қурт боқиш, пиллани қайта ишлаш, ипак ўраш, ипак хомашёси ишлаб чиқариш, ипак эшиш ва тикув цехлари барпо этилади. Яъни, шу ернинг ўзида момиқдан кўрпа, тўшак, ёстиқ, ипакдан турли кийим-кечаклар ишлаб чиқарилади. Корхона тўла қувват билан иш бошлагач, қарийб мингта янги иш ўрни яратилади. Бундан ташқари, дастлабки йили 3,5 миллион доллар, 2021 йилга бориб 12 миллион доллар қийматидаги маҳсулот экспорт қилиниши режалаштирилган.

Бундан тутчиликни ривожлантириш, йилига икки марта ҳосил олиш имконини берувчи янги навлар асосида барпо этилаётган тут плантацияларини кенгайтириш, бу борадаги илғор технологиялар ва иш тажрибасини оммалаштириш мақсад қилинган.

Марҳамат туманидаги «Ипак» фермер хўжалигида янги тут навидан плантациялар барпо этилди. Янги нав маҳаллий иқлим шароитига мос ва серҳосил.

— «Ўзбекистон дурагайи», деб номланган ушбу янги нав кўп йиллик илмий ва амалий ишларимиз самарасидир, — дейди «Ипак» фермер хўжалиги раҳбари Абдупатто Мусурмонқулов. — Маҳаллий шароитга мос, тўйимли ушбу тут мавжуд навларга нисбатан ўн баробар кўп ҳосил беради.

Фахриддин УБАЙДУЛЛАЕВ,

ЎзА мухбири