Ўзбекистон солиқ тизимида «солиқ таътили» ва «ҳалол солиқ тўловчиси» тушунчалари пайдо бўлди.

Солиқ кодексида вақтинчалик молиявий қийинчиликларга учраган ҳалол солиқ тўловчиларга – хўжалик юритувчи субъектларга солиқ таътилларини бериш тартибини белгиловчи ўзгартиришлар киритилди. 

Ушбу таснифдаги солиқ тўловчилар сирасига — охирги икки йил ичида солиқни вақтида ва тўлиқ бажариб, айни вақтда молиявий қийинчиликларга дуч келган солиқ тўловчилар киради. Солиқ таътиллари тегишли қарор қабул қилинган кундан эътиборан йигирма тўрт ойгача бўлган муддатга солиқлар ва бошқа мажбурий тўловларни тўлашни кечиктириш ва (ёки) бўлиб-бўлиб тўлаш, солиқ мажбуриятларини бажариш муддатларини ўзгартириш кўринишида тақдим этилади.