Пенсия – бу ҳар бир инсоннинг меҳнати қадри, кексалик гаштини суриш учун давлат томонидан бериладиган кафолатланган ижтимоий ёрдам. Кўпчилик ҳалигача ёшга доир пенсия ва ижтимоий нафақани бир нарса деб ўйлайди, аслида эса уларнинг фарқи катта.

Камида 7 йил иш стажига эга бўлган эркаклар 60, аёллар 55 ёшда ёшга доир пенсияга чиқиш ҳуқуқига эга бўлади. Агар иш стажи 7 йилга етмаса, пенсияга чиқиш учун эркаклар 65, аёллар 60 ёшни кутишига тўғри келади. Шунинг учун, ёшликданоқ расмий ишлаш ва солиқларни тўлаб бориш келажакдаги хотиржамликнинг ягона йўлидир.

Бугунги кунда давлат тизимига замонавий технологиялар кириб келгани боис, фуқароларнинг ортиқча овора бўлишига ҳожат қолмади. 2025 йил 1 мартдан бошлаб, эркаклар 60 ва аёллар 55 ёшга тўлиши билан уларга ёшга доир пенсия мурожаатсиз, яъни проактив шаклда та­йинланмоқда. Шунингдек, 2025 йил 1 июлдан ногиронлик нафақалари ҳам шу тартибда, яъни идоралараро электрон алмашув асосида автоматик равишда тайинланаётгани фуқароларга катта қулайлик яратмоқда.

Бу имкониятдан фойдаланиш учун энг муҳим шарт – меҳнат дафтарчангиздаги маълумотлар «Ягона миллий меҳнат тизими» ­
(my.mehnat.uz)да тўлиқ акс этган бўлишидир. Агар сиз расмий ишлаётган бўлсангиз, иш берувчингиз маълумотларингизни тизимга киритганини текширинг. Агар ишламаётган бўлсангиз ёки маълумотларингиз электрон базада йўқ бўлса, яшаш жойингиздаги Бандликка кўмаклашиш бўлимига мурожаат қилинг. Бу иш мутлақо бепул амалга оширилади.

Эсингизда бўлсин, меҳнат стажингиз ва иш ҳақингиз ҳақидаги ҳужжатларнинг рақамлаштирилиши келажакда «стаж етишмаяпти» деган муаммоларнинг олдини олади. Қоғоз дафтарча йўқолиши ёки яроқсиз ҳолга келиши мумкин, лекин электрон маълумотлар доим хавфсиз сақланади. Шу боис, барча фуқароларимизни расмий иш ўринларида ишлашга ва меҳнат дафтарчаларини ҳозирданоқ рақамлаштириб қўйишга чақирамиз. Бу сизнинг вақтингизни тежаш, бюрократик тўсиқларни олиб ташлаш ҳамда нафақани адолатли тайинлаш учун қўйилаётган муҳим қадамдир.

Дилшод НАЗАРОВ,

Пенсия жамғармаси Шайхонтоҳур

туман бўлими бошлиғи