Тиниб-тинчимас нукуслик тадбиркор-ихтирочи Рашид Қартбаев яна бир янгилик яратишга қўл урди. У кузда тўкилган дарахт барглари, хас-хашаклардан экологик уй барпо этмоқчи.

— Кузда дарахтлардан тўкилган баргларни кўпчилик ёқиб юборади ёки чиқиндига чиқариб ташлайди, — дейди ихтирочи. — Бунда табиатга жиддий зарар етиши ҳаммага маълум. Улардан мақсадли фойдаланиш учун баргларни йиғиб, баъзи аралашмаларни қўшиб, уй қуришда фойдаланиладиган блокларни ишлаб чиқара бошладим. Бундай уйлар сомондан ишланадиган экологик уйлар каби ёзда салқин, қишда эса илиқ бўлади. Яқинда ҳокимликдан шундай ўнта уй қуриш учун ер майдони сўрадим. Берадиган бўлди. Бу уйлар ҳозирги уйлардан бир неча баробар арзонга тушади, дейилади ЎзА хабарида.