Жорий йилги тест синовларини ташкил этиш тартиби маълум бўлди.

«Ҳуқуқий ахборот» канали хабарига кўра, ҳужжатлар 15 июндан 15 июлгача қабул қилинади. Эътиборли жиҳати, Тошкент давлат юридик университетига ҳужжатларни топшириш учун пойтахтга келиш шарт эмас.

ТДЮУ қабул комиссиясига ҳужжатларни тегишли туман (шаҳар)даги Давлат хизматлари марказлари (олдинги «ягона дарча марказлари»)га топшириш мумкин.

Тест синовларига кириш учун рухсатнома (ДТМ) 29-31 июль кунлари қабул комиссияси томонидан берилади.

Тест синовларини ўтказиш муддатлари ўзгартирилди. Бу йил тест синовлари кундузги, махсус сиртқи ва кечки (сменали) таълим шакли учун 1 августдан 15 августгача бўлган муддатда кунига икки сменада ўтказилади. Биринчи смена соат 08:00 да, иккинчи смена соат 15:00 да бошланади.

Тест синовлари ўтказиладиган бинога абитуриент рухсатномаси ва паспорти билан шахсни идентификациялаш воситалари ҳамда видеофиксация қурилмалари орқали киритилади.

Абитуриент ўқишга кирган ёки кира олмаганини тест синови ўтказилган куннинг эртасига Давлат тест марказининг расмий веб-сайти орқали билиб олиши мумкин.

Тестга шпаргалка, телефон, микрокалькулятор кабиларни олиб киришга уринган абитуриент ўша заҳоти тестдан четлатилади.